Kuzomele awepolitiki abhukule ekunxenxeni intsha edube ukuvota
IMPELASONTO esiphuma kuyo beyibalulekile njengoba bekubhaliselwa ukuvota okhethweni lwangonyaka ozayo. Yize bebekhona abebemagange ngokuqinisekisa ukuthi amagama abo ayavela ohleni lwabazovota, kepha kukhona abebengenandaba. Izizathu zalokhu zehlukene. Okugqama kakhulu okwenza abantu bangabi nantshisekelo yizinkinga ezikhungethe izwe.
Iningi ebelingayihhoyi eyokubhalisela ukuvota beliveza ukuthi kalisiboni isidingo ngoba kalisebenzi nezidingongqangi ziyagqoza. Kuvele nezizathu ezinjengezinga eliphezulu lobugebengu, ukuntuleka kwamanzi nogesi, inkohlakalo kuhulumeni nokunye.
Lokhu kubeke ngokusobala ukuthi abantu balahlekelwe yithemba ngohulumeni. Sibona lokhu kuphonsela inselelo amaqembu ezepolitiki ukuba asebenze kanzima ukujika imiqondo yabantu.
Nekhomishini yezokhetho imelwe wukufundisa abantu ngokubaluleka kokuvota. Kumele abantu bafundiswe ukuthi ukuhlala bengavoti ngeke kusiguqule isimo. Izinto zingashintsha kuphela nxa bevota, hhayi ngokuduba. Izinto ngeke zishintshe ngosuku olulodwa, kepha izwi lawo wonke umuntu libalulekile ukuze kuphile intando yabantu ezweni.
Ngokwezibalo baningi abantu besifazane ababhalisele ukuvota. Imbokodo ingu-55.3% (14
638 074 bese kuthi abesilisa babe ngu-44.7% (11 830 032).
Abantu abasha abaneminyaka eng-18 kuya ku-19 yibo abanezibalo ezincane kwababhalisile. Bahlulwa ngisho nayizaguga ezineminyaka engu80 kuya phezulu. Lezi zibalo zikhomba lapho kufanele kugxilwe khona nxa kufundiswa abantu ngobumqoka bokuvota.
Ngokwezifundazwe, igauteng isahamba phambili ngababhalisele ukuvota abangu-6.1 million. Ilandelwa ikwazulu-natal ngabangu-5.4 million.