Kuyichilo nehlazo okushiwo unyazilwezulu
MHLELI: Ngishiswa yindaba esisuse omkhulu umsindo ezinkundleni zokuxhuma lapho amanazaretha ebhekene khona ngeziqu zamehlo nomvangeli umthembeni P Mpanza.
Lolu daba lususwe wukuthi umnuz umduduzi Shembe (unyazilwezulu) ezibize ngokuthi ungunkulunkulu ngoba ezalwa yinkosi uthingolwenkosazane njengoba ethi nalo uthingo lwalungunkulunkulu.
Manje-ke umpanza uyakuchitha okokuthi ushembe ungunkulunkulu. Sengithi-ke nami ake ngiphumele obala ngalokhu okuzodukisa abantu abaningi.
Ushembe akaze athi ungunkulunkulu uyakuchaza ezihlabelelweni zakhe kwesinye sazo uthi Yizani zizwe nonke siye ekuphakameni siyomkhonza ujehova.
Lokho kukodwa kusho ukuthi ushembe akakaze azibone enebandla noma akaze akucabange ukuthi thina singabakhe.
Akakaze acabange ukuthi yena ungunkulunkulu wethu. Manje le nto eshiwo wunyazilwezulu iyichilo nehlazo ukuthi umuntu onjengaye angazisho yena ukuthi ungunkulunkulu.
Impela kuyakhomba ukuthi le nsizwa ayikunikiwe ukuhola leli bandla likankulunkulu wasekuphakameni.
Njengoba okokuqala nje usefike waliphambanisa nayo inkambo yalo nazo zonke izimiso zalo ebelihamba ngazo nelakhelwa phezu kwazo.
Lokhu kuyichilo ngisho kukhokho wakhe nakoyisemkhulu abake baba ngabaholi kuleli bandla abangakaze bazibize ngonkulunkulu futhi abangakaze balibuke leli bandla njengento yabo.
Sonke lesi sikhathi bekungakaze kukhonzwe isiqu esihlezi esihlalweni size sibizwe ngonkulunkulu okukanye nokuthi sona sizibize ngonkulunkulu.
Kodwa kuyaye kubhekiswe kunkulunkulu owadala izulu nomhlaba kanye namabandla alo onke.
Unyazi selone kakhulu leli bandla ngoba lazi ukuthi yibandla lalo. Okokuqala nje selufike lwalisusa entabeni eyingcwele inhlangakazi laliyisa kwamathanda nhliziyo.
Wafika walifundisa ukuthi lihlabelele izihlabelelo ezingalotshiwe lapha esihlabelelweni sikashembe futhi esingazazi.
Wabuye walifundisa ukuthi lisukume lime ngezinyawo ligwabe njengebandla lamaziyoni nakho lokhu kuphambene nezimiso zaleli bandla.
Waqala ngokuthi abantu abaphuza utshwala abophuza bagcine ngolwesine nakho lokhu kwasimangaza ukuthi yena uvelaphi kanti nokuthi ungushembe onjani.
Selokhu akusho lokhu abantu sebeyaphuza manje benza zonke lezi zinto abazenzayo ngoba basuke sebedakiwe ngeke ubanqande. Ngisho abefundisi abazalelwa lapha ebandleni bayazi ukuthi lokhu kuyicala elingakanani kepha yibo manje abahola izingane ukuthi zisukume zigwabe esontweni nokuthi zihlabelele izihlabelelo ezingaziwa lapha ebandleni.
Namhlanje ibandla liphelelwe yisithunzi ngenxa yamanga, umuntu usukuma phambi kwakhe aqambe amanga ngaye uqobo ukuthi wake waphonswa eweni yena kepha ushembe wamsindisa ekubeni lokho kungakaze kwenzeke.
Naye uyazi ukuthi lo muntu ukhohlisa abantu esikhundleni sokuthi amkhuze wabe esemgcoba ukuthi abe ngumshumayeli.
Okusho ukuthi lo muntu ugcotshelwe ukuqamba amanga. Abantu bakwenza konke lokhu nje yingoba bazitshela ukuthi bakwenziswa ngunkulunkulu.
Siyacela ukuthi isizwe sikwazi ukuthi ushembe miningi imisebenzi ayenzayo emikhulu nemangalisayo kepha kuyaye kusho thina singabantu ukuthi unkulunkulu owenze zonke lezo zinto zikhombisa ukuthi zenziwe ngunkulunkulu okushembe.
Kodwa-ke uma sekunguye othi mina ngingunkulunkulu kuyasithusa.
Nginxusa nabantu bangayikhohlisi ingane yothingo bayibize ngonkulunkulu ingesiye futhi ingeke yaba nguye nanini. Angiyena umlandeli kampanza kodwa ngithanda indlela awukhuza ngayo lo mkhuba omubi kangaka.
Ngiyabonga Mhleli ngiyathemba ukuthi lo mkhuba uzophela ebandleni.