Owesharks uphoxwe ubuthuntu bephendulwa ibhece
IPHINDE yamdumaza ujohn Plumtree, indlela iqembu lakhe elihluleke ngayo ukusebenzisa inqwaba yamathuba eliwakhile ngesikhathi libhekene neconnachy emdlalweni we-united Rugby Championship ngempelasonto edlule.
Isharks ibidlala okokuqala ehollywoodbets Kings Park kule sizini kanti ibilambele umphumela omuhle ekhaya ngemuva kokuhlulwa emidlalweni emine ilandelana phesheya.
Nokho izinto azenzekanga njengokufisa komqeqeshi, uplumtree njengoba isharks inqotshwe yiqembu lase-ireland ngo 13-12.
Ukuqhubeka nokubhabhadiswa ngenduku kusho ukuthi isayibambe emsileni kwi-log ngamaphuzu amabili. Iphuzu lesibili ilicoshe ngokushaywa ngamaphuzu angaphansi kwayisikhombisa ngomgqibelo.
Iqembu likaplumtree lithole izindaba ezinhle ngosuku olwandulela umdlalo livunyelwa ukusebenzisa umdlali wamabhokobhoko, ulukhanyo Am.
Lo mdlali waqale wangafakwa eqenjini lesizwe elivikele indebe yomhlaba efrance ngenyanga edlule kodwa wabizwa sekuzoqala isigaba somkhumulajezi eyovala isikhala sikamakazole Mapimpi.
Nokho, uze waphela lo mqhudelwano engasetshenziswanga, nokungenzeka ukuthi yikhona okwenze ezikaplumtree zivunyelwe ukuthi zingamsebenzisa kuleli sonto, ekubeni iningi labadlali abebesefrance kulindeleke ukuthi liqale ukubonakala emidlalweni emibili ezayo.
Isharks ishaye ama-try amabili, abekwe phansi ngusikhumbuzo Notshe nowerner Kok, ucurwin
Bosch wayibeka phakathi i-conversion eyodwa. Eyeconnacht ishaywe u-sean O'brien, kwathi u-john Hanrahan washaya i-conversion eyodwa namaphenathi amabili.
“Sisamosha inqwaba yamathuba. Kufanele sibe yingozi kakhulu phambili uma sesisebenze kanzima ukuze sizibeke ezindaweni ezinhle enkundleni. Sidlale kangcono kulo mdlalo futhi ngiyaziqhenya ngalokho ngoba yilokho engikuzele kuleli qembu.
“Ngizwa ubuhlungu futhi ngizwela iqembu kakhulu ngoba liyazikhandla kodwa alitholi mvuzo. Yiqembu elinabadlali abaningi abasebancane ngakho-ke kuyazwela. Bayazimisela kodwa asikawutholi umphumela esiwudingayo. Ngiyethemba ukuthi sekuzolunga.”
Uplumtree, obuyele kwisharks ngaphambi kokuqala kwalo mqhudelwano, uthe yinto elindelekile ukuthi kuthathe isikhathi ngaphambi kokuthi iqembu lijwayele amaqhinga akhe nendlela afuna lidlale ngayo.
“Sidlala uhlobo lomdlalo oluhlukile kunalolu isharks ebilusebenzisa eminyakeni eminingi edlule kodwa sisebenzisa abadlali abebevele bekhona. Kulindelekile ukuthi zibe khona lezo zinkinga ezincane futhi kuzoba yinselelo kwabanye abadlali ukuthi bajwayele izindlela ezintsha. Engingakugcizelela ukuthi ngeke sibuyele ekukhahleleni ibhola sizame ukwakha amathuba ngenhlanhla. Ngifuna ukwakha ingcindezi ngokudlala ibhola lombhoxo elihle,” uchaze kanje lo mqeqeshi.
“Angikuthandi ukuhlulwa ngoba angikaze ngihlulwe imidlalo eminingi ilandelana phambilini, kusha nakimi. Ngomsombuluko sizoqala phansi sihlaziye amaphutha ethu. Siyazi ukuthi abezindaba bazosigxeka kodwa ngeke kufike kule ndlela esizozigxeka ngayo thina.”
Amaqembu akuleli athwale kanzima ngemepelasonto kwi-urc njengoba wonke ekhale ngaphansi.ibulls iguqiswe yi-edinburgh ngo 31-23, ilions yathelwa phansi yi-ulster ngo 24-17, istormers yashaywa yimunster ngo 10-3.
Ileinster yase-ireland isiqhwakele kwi-log ngamaphuzu angu-20 emidlalweni emihlanu. Ibulls yehlele endaweni yesikhombisa ngamaphuzu angu-15, istormers isendaweni yesishiyagalolunye ngamaphuzu angu-12 kanti ilions isendaweni ka-13 ngamaphuzu ayisishiyagalolunye.
Isharks izodlala olandelayo kulo mqhudelwano nedragons yasewales ehollywoodbets Kings Park ngomgqibelo ngo-7.05 ebusuku.