Iyethembisa ibafana ebisinuka iqaqa kubalandeli
SEKUPHELE iminyaka engu-21 ibafana Bafana yagcina ukungena ngezikhwepha zayo emidlalweni yendebe yomhlaba. Ngo2010, yangena kule midlalo ngethikithi lokuba ngosokhaya.
Ngakho ukwenza kwayo kangconywana muva nje kuqubule inhlansi yethemba ngokuthi ingase ibe yingxenye yale midlalo ngo-2026.
Inhlansi isuswe nawukunabisa kwayo ibenin ngo 2-1 emdlalweni wokuhlunga obusemoses Mabhida Stadium, ethekwini, ngomgqibelo.
Nomqeqeshi webafana, uhugo Broos, odabuka ebeljium ugcwele ukuzethemba.
Ibafana yagcina ukungena kweyomhlaba ngo-2002, emidlalweni eyayisingethwe yijapan nesouth Korea. Yayibukeka ibambe umgqigqo omuhle kwazise nango-1998 efrance yayikhona.
Emidlalweni edlule ebiseqatar, isale ngaphandle sekuthenjiwe njengoba yehlulwa yighana ngo 1-0 wephenathi eyasusa umsindo kweyokuhlunga.
Ezikabroos ezikleliswe unombolo 64 ezilinganisweni zefifa, zihambela phezulu njengoba sezigijime imidlalo engu-12 ngaphandle kwenduku.
Ngaphezu kwalokho, ukufakwa kwayo eqoqweni elilodwa nenigeria, Benin, Lesotho, Zimbabwe nerwanda kuyibeke emathubeni amahle okuthi izokuba semidlalweni elandelayo ezosingathwa icanada, Mexico ne-us eminyakeni emithathu ezayo. Yize luselude ukhalo kweyokuhlunga, kepha inigeria kuphela okubhekeke ukuba ithwalise kanzima ibafana kuleli qoqo.
Nokho-ke inkinga ngebafana ukuthi ibuye iphoxe sekuthenjiwe. Muva nje, isanda kushaya into ephansi idlala ngokulingana ngo 0-0 neswatini yize ibuye yabhukula yashikilisana ne-ivory Coast emdlalweni wesihle ophele ngo 1-1. Abathandi bebhola abaningi sebaphelelwa yithemba ngeqembu lesizwe. Lokhu kubonakala nangokuthi kuphuma ingcosana uma idlala.