Uphoxekile ukhumalo eshweba esethembile kwelepsl
INDUMALO kusibusiso "Mado" Khumalo ozakhele igama kwimamelodi Sundowns nakwikaizer
Chiefs, kushabalala ithuba lokutshengisa ukuthi usengenza lukhulu kwipremier Soccer League (PSL).
Ngesonto eledlule, kusabalale ukuthi lo makadebona wesitobha usayine kwimilford egijima kwimotsepe Foundation Championship. Ubesejime nayo amasonto amabili ngemuva kokushiya idurban Pioneer edlala kwi-kzn Safa ABC Motsepe League. Ethintwa Isolezwe, ngomsombuluko, uveze ukuthi ugcine engasayinanga kwimilford.
Uthe utshelwe ukuthi akabuye ukuzozama inhlanhla ngojanuwari. Ukhumalo owaqala ukudlala esigabeni esikhulu kwimoroka Swallows, ngo-2008, ngaphambi kokusayina kwisundowns ngo-2010, akakufihlanga ukuthi uphoxekile ngokugcina engasayini kwimilford.
"Okungiphoxa kakhulu ukuthi bese ngizitshelile ukuthi sengilitholile ithuba lokukuveza ukuthi ngisengenza izimanga kwipsl. Sengibuyele kwidurban Pioneer. Ngeke ngililahle ithemba lokubuyela esigabeni esikhulu. Nakwipioneer ngizoqhubeka nokuzimisela kuze kube ziyalunga izinto," kubeka ukhumalo ngomoya ophansi. Izinto aziyihambeli kahle imilford.
Sekuphele imidlalo emine ihluleka ukuthola amaphuzu amathathu.
Idliwe kwemithathu, yadlala ngokulingana kowodwa. Igcine ihlulwe i-upington City ngo-1-0. Namanje akukasukeki endaweni yesi-15 kwi-log.
Emidlalweni ewu-12, isanqobe emibili kuphela. Inamaphuzu ayisishiyagalolunye. Izintambo zokuqeqesha zisabanjwe wuye udkt Xinti Pupuma ongumnikazi weqembu.
Ukhumalo odlale nakwisupersport United nakwi-ajax Cape Town, ukholelwa ekutheni ubengaba isixazululo enkingeni yemilford.
"Ngaphandle kokudlala, bengizophinde ngilekelele ngamaqhinga okuyisa iqembu phambili. Bekuzongijabulisa ukusebenzisa la mava enginawo eqenjini lakithi Kwazulu-natal. Akusenani, ngiyifisela inhlanhla imilford," kusho lesi sitobha esagcina ukudlala kwipremiership kwiblack Leopards ngesizini ka-2020/2021.
Siveze nokuthi sizoziqhubeka nezifundo zokuqeqesha. Njengamanje sinosafa D License. Ngolwesihlanu, imilford izobhekana nehungry
Lions, ngo-3.30 ntambama e-isak Steyl
Stadium.
Ilions nayo ibisaphikwa imiphumela emidlalweni edlule. Isishaywe kabili kulandelana. Isendaweni yesithupha ngamaphuzu awu-19.