Zimkhalele ‘obegwazisa abezitolo zabokufika’
UZOBUYELA ngolwesihlanu enkantolo yemantshi yasevryheid umsolwa okhalelwe amasongo kasigonyela emva kokuvela ukuthi ubeqola ephindelela abezitolo bokufika kuleli ngokubafuna izimvume zokuhweba.
Kuthiwa lona bekuwumsebenzi abesephile ngawo iminyaka.
Umnuz Jabulani Dlangamandla (45) ubhekene necala lokuzenza umsebenzi womnyango wezasekhaya, elenkohlakalo nelokukhwabanisa.
Umsolwa ubingelele inkantolo ngolwesihlanu olwedlule kanti uzobhadla esitokisini kuze kube ulwesihlanu nokuyilapho ezofaka khona isicelo sebheyili.
Umsolwa kuthiwa ubengena ezitolo zabokufika acele ukukhonjiswa imvume yokusebenza, uma owokufika engenayo noma engayiphethe amgwazise u-r1 000.
Umthombo wesolezwe osondelene nalolu daba, uthe selokhu aqala ukumazi udlangamandla ngo-2008, ubezitshela ukuthi uyisikhulu kulo mnyango kwazise kade aqala ukudlubha izikibha zawo eqola abantu.
“Kusho ukuthi ulahlwe elakubo ngosuku aboshwe ngalo ngoba kuthiwa ubesevele esengene ezitolo zabofika ezintathu. Kuthiwa isenzo sakhe bese sivele siqala ukubasolisa abanye, okuthe uma engena kwesinye isitolo umnikazi waso wamcela incwadi eyimvume emgunyaza ukwenza umsebenzi, wahluleka ukuyikhipha,” usho kanje.
Uthe uma ebona ukuthi inhlanzi ishelwa ngamanzi, wazama ukuthathela ngejubane ebheke emotweni yakhe, kwabe usindwe izinyawo, abanikazi bezitolo zabokufika bameqela, bathatha izikhiye zemoto ngaphambi kokuthi babize amaphoyisa, aboshwe.
Lo mthombo uveze ukuthi ngisho unkosikazi kadlangamandla ubazi ukuthi uwumsebenzi kulo mnyango njengoba kuthiwa ubevuka njalo ewumuntu oya emsebenzini abuye ntambama futhi enamapayslip okukholakala ukuthi ubezakhela wona.
Kuthiwa ubehlezi ephethe i-laptop uma eqola kanti ubengagcini lapho, kusolwa ukuthi ubekhiqiza izimvume ezingekho emthethweni okukholakala ukuthi kukhona abesebenzisana nabo ngaphakathi emahhovisi.
Kuvele ukuthi phambilini umsolwa ubeke wathola inkontileka yesikhashana yokuthwebula izithombe ehhovisini elingaphansi kwalo mnyango okukholakala ukuthi yikhona okwamnika ulwazi ngezinto eziningi zangaphakathi.
Ngesikhathi eboshwa kuthiwa utholwe nenqwaba yezitifiketi zomgunyathi, yi-laptop okukholakala ukuthi uyayisebenzisa nezikibha zomnyango ezibhalwe izibongo ezehlukile kwesakhe.