Kuvulwe ihhovisi lesassa lesikhashana echatsworth
IZIHLATHI zivakashela izindlebe kubantu basechatsworth namaphethelo emuva kokuvulwa kwehhovisi lesikhashana elibasiza ngezibonelelo zikahulumeni kule ndawo.
Ngomsombuluko, imenenja yesouth African Social Security Agency of South Africa (Sassa) Kwazulu-natal, unkk Thamo Mzobe, ibiyohlola ukusebenza kwaleli hhovisi.
Unkk Mzobe uthe amahhovisi abathuthele kuwona awomnyango wezokuthuthukiswa komphakathi lapho bekusebenzela khona osonhlalakahle.
“Okwamanje sizosebenzela lapha ngoba sifuna ukusiza abantu bethu.
Siyabonga emnyangweni wezokuthuthukiswa komphakathi ngokusibhekelela ngendawo yesikhashana esizosebenzela kuyona. Sesilitholile ihhovisi, alikho kude nalapha abantu bazokwazi ukufinyelela kalula kulona. Silinde umnyango wemisebenzi kahulumeni ukuthi usinikeze imvume yokuthuthela kulona njengoba silandela imiyalelo yalo mnyango uma kuza ezakhiweni esisebenzela kuzona,” kuchaza unkk Mzobe.
Ukhulume nabasebenzi nabantu akade bezocela usizo kuleli hhovisi.
Unkk Gloria Thembisile
Kweyama wakwandengezi, obeyoshintsha indlela yokuhola isibonelelo sakhe, uthe uyajabula ukuthi amahhovisi akwasassa asevuliwe echatsworth.
“Bengiphatheke kabi ukuthi njengoba ngifuna ukuthi imali yami ingabe isafakwa eposini kodwa ngihole ebhange ngizoba nenkinga. Phela besekufanele ngiye epinetown lapho simiswa khona elangeni. Ngijabulile uma ngizwa ukuthi asevuliwe amahhovisi akwasassa lana ngoba asimi isikhathi eside futhi sihlaliswa emthunzini, bayashesha nabasebenzi balapha,” kusho unkk Kweyama.
Uthe useshintshela ebhange ngoba ukhathele wukuthi imali ibambezeleke ngenxa yezinkinga zasepostbank.
Unkk Sthembile Magwaza obhekelele ukusebenza kwehhovisi lakwasassa, echastworth, uthe bajabule kakhulu ngokuthuthela ehhovisi elisha eliseduze kwalapho bebesebenzela khona.
Uveze ukuthi ibhilidi akade besebenzela kulona belinetha sengathi yisisefo, bengakwazi nokusiza abantu kulona ngenxa yokuthi amaphepha ebeba manzi.
Uthe bebengahlaliseki uma lina kodwa manje bayajabula ngoba basebenzela endaweni ephephile futhi ibhilidi elisha liseduze nenxanxathela yezitolo namatekisi. Lokhu kuzobasiza abantu ngoba ngeke bangene ezindlekweni ukuya emahhovisi amasha.