Kudingeka sonke sibambisane silwe nesihlava sokwebiwa kwemfuyo
KADE ngimenywe komunye wemisakazo emikhulu kwelikamthaniya, ngimenywe umsakazi umapholoba, isihloko ebesimungunywa ukwenyuka kwezibalo nezigameko zokuntshontshwa kwemfuyo kwelikamthaniya. Abafuyi nomphakathi bakhala ngezinga eliphezulu lokwebiwa kwemfuyo.
Ngenze uphenyo oluncane, ngathuka ukuthi lolu daba lubucayi futhi seludlondlobale kangakanani. Ngazibuza ukuthi kungenzeka yini ukuthi le nyama esezithebeni zethu, esiyiklamuza size sincinde iminwe kusuke kukhalwa lapho ithathwe khona. Ngasho ngathi mhlawumbe ingakho abanye abantu begula ngokugijinyiswa yisisu ngoba imvelo isuke isho ukuthi inyama yokwebiwa le.
Umbuzo omkhulu uthi senze njani ukuze silwe nalesi sihlava, asikhumbule ukuthi imfuyo ibaluleke kanjani, empilweni yethu. Kunemizi eme ngenxa yemfuyo, kunezingane ezifundayo emanyuvesi ngenxa yemfuyo, okuningi okuthinta usiko lwethu kudinga imfuyo. Uyashada, uyemulisa, uyashweleza, uyahlamba kudluliwe emhlabeni konke kudinga imfuyo. Ngingakhohlwa kanjani ukuthi nokudla esizokudla namhlanje ebusuku okunye kwako kuzobe kuyimfuyo, umbuzo omkhulu uthi ngabe inyama enhle noma inyama yokwebiwa yobumnyama?
Lapho kuphulwa khona umthetho, sithemba ukuthi umthetho uzongenela, ukungenela kukhomba ukungena kwabakwasidlodlo. Singakhohlwa kanjani abashushisi, akuyibona abasitholela ubulungiswa enkosini yenkantolo.
Bikela amaphoyisa ngokushesha, ukubika kwakho akube nemininingwane egcwele njengenhlobo yemfuyo, uphawu enalo futhi ugcine nini ukuyibona.
Uma uphuma emaphoyiseni, phuma NECAS number, lena inombolo yakho ozoyimemeza uma usufuna ukulandelela ukuthi kwenzekeni odabeni lwakho.
Ukusebenzisana phakathi kwabaphenyi nawe kubalulekile, qiniseka ukuthi ubhale izinombolo zocingo okuyizona, ikheli lakho kube ngeleqiniso uphinde ufake nemininingwane yomuntu osondelene naye ukuzi bakwazi ukukuthola uma udingeka.
Uma uphenyo seluphelile, uphiko lwabashushisi lulungiselela ukuthi udaba luyongena enkantolo. Bazokubiza bakhulume nawe.
Uma sekufikwa enkantolo fika ngelanga lecala nalapho ubizwe khona ukuthi uzokwethula ubufakazi.
Uma kukhona ongakutholi kahle, buza khona uzothola incazelo, ungakhohlwa njalo ukuthi usengakwazi ukuba nommeli wakho ukuze akuchazele kahle.
Uma usola okuthile ngamaphoyisa, thintana nophethe abaseshi noma umphathi siteshi. Uma ungasizakali phuthuma kwi-ipid (Independent Police Investigative Directorate) phela kulolu hlaka siceba amaphoyisa angenzi kahle.
Uma inkinga ibonakala sengathi ikubashushisi, thintana nomphathi wophiko lwenational Prosecuting Authority (NPA) ukuze bakwazi ukuthatha udaba lwakho luye phambili.
Ungakwazi ukuqasha owakho ummeli azoba yiso lakho.
Yikuphi okunye okungenziwa umphakathi, amaphoyisa nezinkantolo ukulwa nalobu bugebengu.
Amacebo azokwenza kubelula,ukuthola noma ukuze kube nobufakazi bokuthi imfuyo yakho.
Ukubakhona kwezinhlaka zomphakathi ezibhekele ubugebengu ngokwezigceme.
Ukukhethwa nokufakwa kophawu ngokwezigceme nobakho emfuyweni ukuze kube lula ukuthi kwaziwe ukuthi uma kukhona okulahlekile okukabani.
Iba nesikhathi lapho imfuyo kumele iphume noma isibuyile ekhaya khona uzokwazi ukubona uma kukhona okungahambi kahle.
Akwakhiwe izinhlaka zokulwa nobugebengu (community policing forums) ezizokwazi ukuxhumana nezigodi kanye namaphoyisa.
Ukufundiswa komphakathi ngobungozi nesihlava sokuthengwa kwemfuyo entshontshiwe, singagcini lapho sifundise nabanikazi bezitolo, amabhusha kanye namashisanyama ngobungozi bokuba nezinto ezintshontshiwe.
Ukucijwa kwamaphoyisa ngamakhono ukuze akwazi ukuphenya lobu bugebengu kangcono.
Ukucijwa kwabashushisi ngamakhono kanjalo nabehluleli ukuze bezokwazi ukushushisa nokwahlulela kangcono.
Singabakhohlwa kanjani osopolitiki bethu, phela uzokhumbula ukuthi bahlala esishayamthetho benquma bephasisa imithetho esilawulayo, nabo bayadingeka ukuze kushaywe imithetho ezokwazi ukulwa nalesi sihlava futhi kube nezigwebo eziqinile.
Ubuchwepheshe nabo bunendima okumele buyidlale la, izinto ezifana ne-tracker, amathuluzi asiza ukulandelela ukuthi imfuyo yebiwe yayiswaphi.
Ukulwa kunqotshwe ubugebengu kuzodinga thina sonke ukuthi sibe nendima esiyidlalayo. Ngeke sawushiya unembeza, yiwoma okumele uhambe phambili.