Kungani emsebenzini bekhathazeka uma ‘ushaywe’ ku-insta wakho

IZINKUNDLA zokuxhumana zingabonakala ziqhelelene kakhulu nendawo yokusebenza kepha seziphenduke inxeba elikhulu lokungena ezinkampanini ezinkulu. Izigebengu zobuchwepheshe sezisebenzisa izinkundla zokuxhumana zabantu ukuthola imininingwane ebalulekile yezinkampani ukuze zingene kalula.

Ngisho imininingwane enge“bucayi” yomuntu noma yenkampani isingasetshenziswa ebugebengwini bobuchwepheshe njengokuntshontsha imininingwane yomunut, ukulingisa umuntu noku“shaya” abantu ezinkundleni zokuxhumana.

UKUNTSHONTSHA IGAMA LOMUNTU

Amaqili ezinkundla zokuxhumana aqoqa imininingwane yezinkampani neyabantu ngesigaba sokuqala sokuhlasela uma zigadla.

Zibona abantu ezingabashaya nezindlela ezingangena ngazo. Imininingwane abasebenzi abayifaka ezinkundleni zokuxhumana inezinkomba eziningi izigebengu ezingayisebenzisa ukubashaya.

Isibonelo nje, izilokotho zosuku lokuzalwa ezinkundleni zokuxhumana zingasiza izigebengu ukuthi zibone izinombolo eziyisithupha zokuqala zikamazisi wakho. I-profile yakho ezinkundleni zokuxhumana zingenza ukuthi izigebengu zibone inombolo yesikhombisa kuya kweshumi zikamazisi wakho (ezabantu besifazane o-0000 kuya ku-4999 kanti ezabantu besilisa o-5000 kuya ku-9999). Inombolo yesi-11 kamazisi wakho (u-0 noma u-1) zingabonakala ngokuthi uyisakhamuzi saseningizimu Afrika. Izigilamkhuba, zihlome ngenombolo yomazisi wakho, imininingwane yezingane zakho namagama ezilwane zabo, amabhendi ayintandokazi yakho nezinto ozithandayo, zingakwazi ukuqagela ama-password akho bese zikuhlasela ngawo i-email yakho, ama-akhawunti akho nezindlela zokungena emsebenzini.

I-INSTA PHISHING

Izinto ozifaka ezinkundleni zokuxhumana zingenza kubelula ukuthi “ushayeke”. Asithi nje isibonelo uma i-profile ithi uyinhloko yezezimali enkampaninini futhi uposa izithombe zeholidi lomndeni wakho, lokhu kungakulimaza. Lokhu kungahlomisa izinswelaboya zobuchwepheshe ngolwazi olwenele ezingakuhlasela ngalo ngokushaya umlingani wakho, phecelezi I-BEC.

Uma ushaywa ngebec attack, amaqili azenza abasebenzi abakhona, ayalele abasebenzi ukuthi bafake imali kuma-akhawunti noma benze i-download yesenameko. Esibonelweni esingenhla, iqili lingathumela umuntu ophethwe emsebenzini umyalezo othi: “Ngiseholidini ethekweni kanti kukhona ikhasimende engikhohlwe wukulikhokhela ngaphambi kokuthi ngihambe. Ngicela ulifakele imali yakho kule akhawunti.”

I-RANSOMWARE

Okubi kakhulu wukuthi amaqili ezinkundla zokuxhumana angalutha abantu ukuthi bawanike uhla lwamagama abantu abangathintwa.

Imiyalezo eqonde ngqo yezinkundla zokuxhumana isivame ukusetshenziswa ukuthumela abantu i-malware ebavalela kuma-akhawunti abo bese ithumela bonke abantu ababaziyo imiyalezo. Osomabhizinisi abancane abahweba ngezinkundla zokuxhumana bavame ukushaywa yi-malware ngale ndlela.

I-VISHING

Ulwazi abantu abaluveza ezinkundleni zokuxhumana luhambisana nokuwakwa ngevishing, i-voice phishing.

Isibonelo nje uma ukhala ngebhange lakho ezinkundleni zokuxhumana, imiguluku yobuchwepheshe izothola imininingwane eyidingayo ukuthi ikuthinte ithi ishaya emnyangweni osiza amakhasimende wasebhange. Kungenzeka yazi inombolo yakho kamazisi, ikheli nezinkinga oke waba nazo nebhange lakho. Ngenxa yokuthi kuyakholakala, abantu abaningi bayalutheka bese bekhipha ulwazi olumqoka olufana nembolo eyimfihlo yekhadi.

* U-walt ungomunye wabasunguli nomqondisi eport443