Ubavuma usazibophezele ekuholeni iqembu lesizwe
USAZIMISELE ukuqhubeka nokuhola iqembu lesizwe uma egcinwa kulesi sikhundla ukaputeni weqembu labesilisa lekhilikithi, utemba Bavuma.
Ubavuma (33) akakwazanga ukufaka iqembu lakhe kowamanqamu endebeni yomhlaba njengoba begcine bekhishwa yi-australia kowandulela owamanqamu, egcine ingompetha.
Besekungokwesihlanu amaproteas eqhuzuka kulesi sigaba kwazise kwenzeka okufanayo ngo-1992, 1999, 2007 nango-2015.
Esigabeni samaqoqo, anqobe imidlalo eyisikhombisa kweyisishiyagalolunye ayidlalile, ehlulwa inetherlands nosokhaya i-india.
“Ngeke ngisho ukuthi sibe nomqhudelwano oyimpumelelo ngoba asikuzuzanga ebesifuna ukukuzuza, obekuwukuzibona siphakathi kowamanqamu. Kubalulekile kodwa ukuthi sijabulele okunye esikwenze kahle, njengesibalo semidlalo esiyinqobile esigabeni samaqoqo nohlobo lwekhilikithi esiludlalile ezinyangeni eziyisikhombisa kuya kweziyisishiyagalombili ezedlule,” usho kanje ubavuma ekhuluma nabezindaba kulandela uhambo olusuka e-india.
“Kuningi okuhle esingakuthatha kulo mqhudelwano. Kusobala ukuthi besifuna ukubuya nendebe kodwa akumele sizizwe sengathi konke esikwenzile bekuyize leze.”
Ubavuma uphinde waphawula ngokudlala kwakhe kowandulela owamanqamu ekubeni wadonseka umsipha betholene phezulu ne-afghanistan kowokugcina wamaqoqo.
Uthe wakhetha ukudlala ngoba efisa ukulekelela iqembu , hhayi ngoba ezama ukuzenza iqhawe.
“Bengingacabangi ukuthi ngizobonwa njengeqhawe noma umuntu ocekele iqembu phansi. Bekuwumdlalo owandulela owamanqamu futhi njengomholi bengifuna ukuba senkundleni nozakwethu,” uchaze kanje.
“Yisinqumo okuthe uma ngisithatha ngaxoxa nabadlali asebebadala eqenjini, ngachaza ukuthi angikho ezingeni lami eliphelele kodwa ngingakwazi ukudlala futhi ngifuna ukuba nabo.
“Ngesekwe yiqembu lonke futhi bengingazikhathazi ngokuthi mina ngizobonakala kanjani. Abantu bangangibiza ngezinto eziningi kodwa angisoze ngaba wumuntu ongabeki iqembu phambili.”
Lo mdlali odabuka elanga, ekapa, ugxekwe ngabalandeli nabahlaziyi bekhilikithi ngenxa yokuhluleka ukuthola ama-run amaningi kule Ndebe yomhlaba. Nokho, bakhona abanye abebemvikela ezinkundleni zokuxhumana ngenxa yamagalelo akhe asize iqembu lazibekisela indawo kulo mqhudelwano.
Uthe usazimisele nokuqhubeka ukuhola iqembu uma umqeqeshi emgcina kulesi sikhundla. Ebuzwa ukuthi usazimisele yini ukuqhubeka nokudlala imidlalo yama-over angu-50, uthe akakaze afikelwe wumcabango wokushiya lolu hlobo lwekhilikithi.
“Ngicabanga ukuthi kuwukuhlakanipha ukudlulisa imizwa yendebe yomhlaba kuqala, ngizinze kancane ekhaya, ngaphambi kokuhlela indlela eya phambili. Ngisazimisele ukuba yilokhu iqembu nomqeqeshi abadinga ngibe yikhona,” usho kanje.
“Ukuba
ukaputeni wumsebenzi enganikwa ithuba lokuthi ngiwenze kodwa lokho akusho ukuthi sekuyifa lami. Akekho umuntu owazalelwa isikhundla esithile. Ngizokwenza uma umqeqeshi neqembu bebona sengathi kusangifanele.
"Nganikwa umsebenzi wokuhola futhi ngibona sengathi ngiwenze kahle. Yebo, angidlalanga kahle endebeni yomhlaba kodwa ngicabanga ukuthi ngishaye kahle emidlalweni esiyidlale ngaphambi kwalo mqhudelwano. Sinesikhathi esincane sokuphumula nemindeni yethu ngaphambi kokulungiselela imidlalo ezayo. Akukaze kufike nhlobo emqondweni wami ukuthi ngiyeke ukudlala imidlalo YE-ODI.”
Amaproteas azodlala uchungechunge lwemidlalo emithathu ye-t20 ne-india kuleli kusukela ngodisemba 10. Luzolandelwa olwemidlalo emithathu yama-over angu-50 oluzoqala ngodisemba 17.