Zizojika izinto kwisharks ngokuhamba kwesikhathi - Powell
UTHEMBISA ukuthi zizojika izinto eqenjini umqondisi wezombhoxo kwihollywoodbets Sharks, uneil Powell, yize kungenzeka kuthathe isikhathi.
Leli qembu lamemezela ukuthi upowell, obengumqeqeshi weqembu lesizwe lombhoxo wesevens, usezoba ngumqondisi ngomeyi nyakenye, waqala ukusebenza ngo-okthoba sekusongwe isizini yeworld Sevens Series.
Akuthathanga sikhathi ukuthi abanjiswe kwesokuqeqesha njengoba anikwa izintambo ngodisemba, kulandela ukuxoshwa kukasean Everitt ngenxa yemiphumela engemihle.
Isharks yafinyelela kweyomkhumulajezi kwi-united Rugby Championship ngesizini edlule, yakhishwa yileinster kuma-quarter-final. Nakwi-heineken Champions Cup leli qembu lafinyelela kuma-quarterfinal.
Kwaba nesasasa kubalandeli besharks ngomeyi iqembu liqinisekisa ukuthi lizobuyisa umqeqeshi wasenew Zealand, ujohn Plumtree owalicija kusukela ngo-2008 kuya ku-2012. Ngaleso sikhathi isharks yaqeda isomiso sezindebe esasiqale ngo-1997, inqoba icurrie Cup ngo-2008 nango-2012.
Ukubuya kukaplumtree kwenza abalandeli babuyelwa yithemba lokuthi lizoqala ukudlala uhlobo lombhoxo oluthokozisayo, nokuyinto ebiyivelakancane eminyakeni edlule.
Kugqamile ngomgqibelo ukuthi seziqala ukwehla izihlathi kubona ngesikhathi bebuka iqembu labo liqunjwa phansi yiconnacht yaseireland ngo 13-12 emdlalweni WE-URC ehollywoodbets Kings Park. Bese lidliwa okwesihlanu kulandelana kulo mqhudelwano, kwazise liwuvule ngesibhaxu semidlalo emine ilandelana phesheya, futhi lisasemsileni we-log ngamaphuzu amabili.
Ekhuluma ngemuva komdlalo, uplumtree ukubeke kwacaca ukuthi isimphatha kabi indaba yokuphikwa yimiphumela isikhathi eside kangaka.
“Siyazi ukuthi kusadingeka sibeke inqubo ethile futhi sihleleke kahle, ngaphakathi nangaphandle kwenkundla. Kunzima ukunquma ukuthi lokho kuzokwenzeka nini. Sengike ngaba yingxenye yamaqembu lapho besizitshela khona ukuthi izinto zizohlangana eminyakeni emibili kodwa zilunge ngonyaka owodwa,” kusho upowell.
“Sijabule ngekusasa leqembu futhi sibona sengathi sibheke endaweni enhle. Kuthatha isikhathi ukuthi abadlali bajwayele ukwenza izinto ngendlela ehlukile. Kumele baqonde ukuthi yini elindelwe kubona kulezi zinhlelo ezintsha esesisebenza ngaphansi kwazo.”
Upowell uthe ngesikhathi efika kwisharks kumthusile ukubona iqembu lingenzi izinto ngendlela elindeleke emaqenjini adlala ezingeni eliphezulu.
"Sisebenza ngezinhlelo esizogxila kuzona isikhathi eside futhi ezibheke empumelelweni. Akuyona into ezosebenza iminyaka emibili kuphela bese iphelelwa yisikhathi.
“Yizinto esibheke ukubambelela kuzona eminyakeni emihlanu kuya kwengu-10 ezayo," kuqhuba upowell.
“Lokho kuhlanganisa izinto ezifana nokuthengwa nokugcinwa kwabadlali. Kumele sithole abazohambisana nezinhlelo zethu, akukhathali noma sibathola ezikoleni, enkulisa yethu noma kwamanye amaqembu. “Kumele sigcine nabadlali esesinabo esikholwa wukuthi bazoba wumgogodla weqembu, hhayi nje kule minyaka emithathu ezayo kodwa kuze kufike eminyakeni engu-10. Ukwenza inqwaba yezinguquko kuphazamisa okuningi, ngakho-ke kumele sizame ukukugwema.”
Isharks izophinde izame ukunqoba okokuqala uma isibhekene nedragons eholllywoodbets Kings Park ngomgqibelo ngo 7.05 ebusuku.
Leli qembu lasewales nalo aliwuqalanga kahle umqhudelwano njengoba lilele endaweni ka-14 ngamaphuzu ayisithupha. Lisanqobe umdlalo owodwa, lahlulwa kwemine.