Iswallows ixwayiswe ngokungayeyi ichiefs
UMDLALI wasesiswini kwimoroka Swallows, ulindokuhle "Ma11" Mtshali, uthi yize bewadinga ephelele amaphuzu emdlalweni wabo nekaizer Chiefs ebhedelwa yifomu, ngeke bayithathe kancane nangephutha.
Iswallows izodudulana nechiefs kowedstv Premiership edobsonville Stadium, esoweto, ngesonto ngo-3.30 ntambama.
Iswallows, esayiqale kahle isizini, iza kulo mdlalo nje emidlalweni emine yakamuva yepremiership inqobe emibili, yadlala ngokulingana kwemibili.
Ngakolunye uhlangothi ichiefs ibhinjelwa yizinto njengoba emidlalweni emine inqobe owodwa yashaywa kwemithathu, okubalwa nowomkhaya basesoweto, i-orlando Pirates.
"Ukubuya kwethu namaphuzu amqoka emidlalweni yethu yakamuva kuyasikhuthaza kakhulu ekulweleni ukugcina umgqigqo njengoba inhloso kuwukuqeda umzuliswano wokuqala wesizini singaphumanga emaqenjini aphezulu kwi-log.
Nokho siyazi ukuthi ngeke kube lula uma ubheka imidlalo esisazoyidlala okubalwa nawo lo wechiefs.
Ukungadlali kahle kwechiefs emidlalweni yakamuva kusho khona ukuthi ngeke kube lula ukubhekana nayo ngoba ingase isebenzise lo mdlalo ukubuyisa isithunzi.
Ngakho sibuqonda kahle ubumqoka balo mdlalo futhi sidonswe ngendlebe (ngumqeqeshi) ngobungozi bokuyithatha kancane ichiefs.
Kodwa noma kunjalo siwafuna ephelele amaphuzu kuyona," kusho umtshali odabuka Kwamaphumulo.
Izinyoni njengamanje ezisendaweni yesihlanu kwilog yepremiership, kubukeka zishaya ngolunye unyawo kule sizini ngaphansi komqeqeshi usteve Komphela, othathe izintambo zokuqeqesha leli qembu ngaphambi kokuqala kwesizini esuka kwimamelodi Sundowns.
Emidlalweni esalele izinyoni ngaphambi kokusonga umzuliswano wokuqala, kubalwa owechiefs (ekhaya), isupersport United (ekhaya), iroyal AM (ekuhambeni), nelamontville Golden Arrows (ekhaya). Akuyihambeli kahle ichiefs esishintshe nomqeqeshi. Ihleli endaweni yeshumi kwi-log ngamaphuzu awu-14 emidlalweni ewu-12.
Umolefi Ntseki obengumqeqeshi uxoshwe ngenxa yakho ukunganqobi. Izintambo zibanjiswe ucavin Johnson naye osahlanganisa iqembu.