Nizozisola uma niphinde nivotela I-ANC: Hlabisa
UMENGAMELI WE-IFP, umnuz Velenkosini Hlabisa, uthe abantu bakuleli bazozisola uma beke baphinda bavotela I-ANC.
Uhlabisa uthe kuzokwanda ukubhubhudlwa kwemali nokungahanjiswa kwezidingo uma I-ANC ingase ibuyele emandleni. Ukusho lokhu ngesikhathi enomhlangano womphakathi, emgungundlovu, ngolwesithathu ebusuku.
“Kungaba inhlekelele uma singase siphinde senze iphutha lokunikeza I-ANC elinye ithuba lokuphatha. Bazontshontsha kakhulu, baphinde balale kakhulu ngoba bazobe bazi ukuthi baneminyaka emihlanu bephethe.
“Abantu bakuleli bazoqala phansi babhikishe, bekhala ngokungalethwa kwezidingo. Kuyothi kushaya u-2029, abantu bayobe bekhala. Uyabona nje inkinga yokucishwa kukagesi, i-eskom isishilo ukuthi izoqhubeka ebusika. Ngobusika basho emva kokhetho.”
Uhlabisa uthe I-ANC ithole ithuba elanele lokuthi ishintshe impilo yabantu, yahluleka. “Iminyaka engu-30 iyithuba elanele obekufanele balisebenzise. Kunokuthi impilo ibe ngcono ngaphansi kukahulumeni wentando yabantu, izinto zivele zabheda kakhulu. I-ANC ihluleka ngisho ukwenza kahle le zinto uhulumeni wobandlululo owawuzenza kahle.
“Ingakho ngomhla ka-29 kufanele sonke sivotele ushintsho. Abantu akufanele basabe ukuvotela ushintsho. Abantu akufanele bavote ngezinhliziyo. Akufanele bavote ngokuthi ugogo wami wayeyile nhlangano. Abantu kufanele bazi ukuthi ukuhamba kukagesi kuzokukhahlameza noma ngabe ugqoka isikibha esiyellow”
Uhlabisa uthe bona bafuna ukunikwa ithuba iminyaka emihlanu kuphela, wathi kuyodingeka bakhishwe uma behlulekile ukuphatha.
“Bonke labo abaphakanyiselwe ukuba baye ephalamende nasezishayamthetho, ngihlezi ngibatshela ukuthi kufanele sikhishwe emandleni uma sihlulwa ukwenza umsebenzi wethu. Uma sihluleka kule minyaka emihlanu ezayo, kufanele abantu basikhiphe ngo-2029.”
Uhlabisa uthe nakomasipala abaphethe kubo, ufuna bakhishwe lapho bengenzi kahle khona uma sekunokhetho lohulumeni basekhaya olulandelayo.
“Laba abaphethe komasipala ngihlezi ngibatshela ukuthi mina ngeke ngihambe ngixolisa njengoba kwenza elinye iqembu, lihambe lithi liyaxolis.
“Akekho umuntu ozolala emsebenzini. Kufanele kusetshenzwe. Laba abazolala emsebenzini ngeke ngihambe ngibancengela ukuthi babuyiselwe emandleni.”