I-DA izoqopha umlando ngomcimbi EKZN
I-DA izokhombisa amandla ayo Kwazulu-natal ngokusingatha ingqophamlando yomcimbi ongakaze ubonwe emlandweni wale nhlangano.
I-DA izokuba nomcimbi omkhulu kunayo yonke leli qembu eselike laba nayo ethekwini, kusasa.
Lenhlangano izokuba nomcimbi wokukhankasela ukhetho enkundleni eyaziwa ngokusingatha imicimbi emikhulu yezepolitiki, icurrie’s Fountain.
Usihlalo weda Kwazulu-natal, umnuz Dean Macpherson uthe balindele ukuthi umcimbi uhanjelwe ngabantu abangu-10 000.
Ukusho lokhu ekhuluma esithangamini nabezindaba, lapho ebecacisa khona ngamalungiselelo omcimbi.
Uthe sebekulungele ukwamukela izinkulungwane zabantu abazohambela umcimbi wakusasa.
“Akuziqondanelanga nje ukuthi sikhethe icurrie’s Fountain, okuyinkundla enomlando wokusingatha imicimbi yezamasiko, eyezemidlalo, neyezepolitiki.
“Lenkundla inomlando ojulile weminyaka ewu-100. Siyazi ukuthi imikhankaso eyenzeka kule nkundla iyaye iholele ekutheni kube noshintsho ezweni, ”kusho umnuz Macpherson.
IDA ayizibekile phansi emkhankasweni wakwazulu-natal, iphakamisa imeya yasemngeni, umnuz Chris Pappas, kwesobundunankulu.
Umacpherson uthe umcimbi wakusasa uzolekelela umkhankaso wabo wokunqoba ikwazulunatal. Umholi weda, umnuz John Steenhuisen uzokwethula inkulumo yosuku.
Umcimbi uzohanjelwa ngabaholi abaqhamuka lapha Kwazulu-natal nakuzo zonke izinkalo zezwe.
“Simagange ukuzwa inkulumo kasteenhuisen, eyomholi weda Kwazulu-natal, umnuz Francios Rodgers, ekasotswebhu weda ephalamende, unksz Siviwe Gwarube, eyokhulumela IDA kuzwelonke, umnuz Solly Malatsi nenkulumo kamnuz Pappas.
“Izinkulumo zizogqugquzela abantu bakwazulunatal ukuvotela IDA ukuze upappas ezokuba undunankulu.
“Ngingasho ukuthi konke sekumi ngomumo. Sikulindele ukusingatha umcimbi oyimpumelelo, sijabulise izinkulungwane zabantu abazowuhambela,” kuphetha umacpherson.
Umcimbi omkhulu wokugcina weda ngaphambi kokhetho uzokuba segauteng ngomeyi 26.