Basophe ukugcina isithunzi sothisha ngenhlangano

I NHLANGANO yothisha asebathatha umhlalaphansi iretired Educators Voice (REV) ihlose ukubuyisa isithunzi sothisha ngokuthi ibagcine bematasa futhi basebenzisa nesipiliyoni sabo ukusiza emphakathini. Okuseqhulwini kule nhlangano ukunakekela othisha asebathatha umhlalaphansi iphinde inakekele abafundi ngokubasiza ngemisebenzi yasekhaya ntambama iphinde ibathengele imifaniswano yesikole kulaba abangathathi entweni. Usihlalo wale nhlangano umnuz Msizi Ngcobo, ekhuluma nesolezwe, uthe ngaphandle kokuhambela amalungu abo agulayo nemindeni yamalungu asedlule emhlabeni kuningi okunye abahlose ukukwenza. “Inhloso enkulu ukuthi sibuyise isithunzi sikathisha futhi sibhekelele izikole nabafundi abaswele. Siyalekelela ukuthengela abafundi imifaniswano yesikole nezicathulo. Okunye esihlose ukukwenza ukuthi siqale isikhungo sokuthi bathibe indlala,” kusho ungcobo. Unkk Nomvula Mkhwanazi onguthisha owathatha umhlalaphansi efundisa esikoleni samabanga aphansi esisemlazi ingilosi, uthe IREV yenza ukuthi aphile. “Uma uhleli ekhaya ungenzi lutho ugcina usuyisalukazi. Ukungena kwami kule nhlangano ngiphilile njengoba sengize ngaqala nokufundisa amakilasi antambama. Ngifundisa izingane eziqhamuka ezikoleni ezehlukene, ngizenzise umsebenzi wasekhaya eziwunikwe esikoleni,” kusho unkk Mkhwanazi.

Unkk Bongiwe Mbatha wasendwedwe obefundisa esikoleni saselindelani, Isicelulwazi, uthe kuningi akufundile kule nhlangano njengokugcina isithunzi sikathisha njengoba bebenenkonzo yokuhlonipha ozakwabo abangasekho.

“Okukhulu engikwenzayo ukulekelela izingane ikakhulukazi labo abahlulwa isifundo sezibalo njalo ntambama nangomgqibelo. Engikuthanda kakhulu ngerev ukuthi ikwenza uhlale ukhuthazekile futhi sibona nabantu esasifunda nabo kudala,” kubeka unkk Mbatha.

Ngolwesithathu, le nhlangano ibe nenkonzo yokukhumbula ozakwabo abangasekho, EDLI

Hall, egreyville, ethekwini.

Kule nkonzo kukhunjulwe onkk Sbongile Ndlovu, Khanyisile Zondo, Duduzile Mlanduli nofezile Nkomo abadlule emhlabeni ngomashi no-ephreli kuwo lo nyaka.

Le nhlangano engenzi nzuzo yasungulwa ngo-2018 ngoba kubonakala ukuthi othisha asebathatha umhlalaphansi ababe besanakwa, yenza okuningi njengoba ihambela ilungu lale nhlangano uma lixinwe ukugula, ilekelela ngokulifihla uma selidlule emhlabeni nokunye.

Inamagatsha amahlanu elisemlazi, Durban South,

Durban North, Durban Central nasemfume.

Isithombe: NHLAKANIPHO MNQAYI AMALUNGU enhlangano iretired Educators Voice (REV), kwesokunxele onkk Thandi Mthembu, Nomvula Mkhwanazi, Mnuz Msizi Ngcobo (usihlalo WEREV), nonkk Busisiwe Manqele kanye nobongiwe Mbatha (unobhala)