Eden se dames en juniors wen in winderige skietkompetisie
Tydens die naweek van 20 Oktober is die Wes-Kaapse interdistrikteskietkampioenskappe tussen Eden, Kaapstad en die Wynland tydens die WP Ope afgehandel aan die Weskus.
Die kompetisie sal onthou word vir die wind wat nooit bes gegee het vanaf Vrydag wat die skuts begin opdaag het tot en met Sondag toe hulle weer vertek het nie. Windkondisies tydens die Saterdag se skiet het nooit onder 24km/h gegaan nie en het die 161 skuts behoorlik laat kopkrap.
Die kompetisie wat strek oor drie bene tussen die mans-, dames- en juniorspanne van die onderskeie distrikte is deur die loop van 2018 te George, Montagu en Yzerfontein beslis tussen die onderskeie spanne.
Eden-jaggeweerskiet in samerwerking met die Eden-sportraad se volgehoue ondersteuning in junior- en vroueontwikkeling van die skietsport is weer in 2018 beloon deurdat Eden se dames- en juniorspan die reeks as oorwinnaars afgesluit het, met Eden se mans in die tweede plek.
Die reeks skep die geleentheid vir kompeterende skuts om amptelike erkenning te kry en word die skut se harde werk en tyd wat ingesit is deur die jaar met provinsiale kleure beloon. Daar is tans nie minder as sewe van Eden-jaggeweerskiet se lede in die nasionale top 50 ranglys, wat insluit een dame en twee juniors – voorwaar ‘n puik prestasie. –