Lloyd beplan gim vir Andersonville
‘n Buiteluggimnasium in Andersonville, Pacaltsdorp, presies op die plek waar mense tot onlangs van hul tuinvullis en ander gemors ontslae geraak het, dít is die projek wat die bekende langafstandatleet, Lloyd Bosman, volgende wil aanpak. Bosman is self ‘n inwoner van die woongebied en reken ‘n gimnasium is die ideale oplossing vir ledigheid onder jongelinge en sal boonop keer dat mense daar onwettig vullis stort. Dié plaaslike langasem van Nedbank SWD-atletiekklub het al talle medaljes ingeryg, maar nou wil hy ‘n steil bult vir sy gemeenskap uitdraf en ‘n buiteluggimnasium in Andersonville oprig.
Met die hulp van George-munisipaliteit is dié area op die hoek van Reier- en Missionstraat reeds skoongemaak en Bosman het ‘n paar moontlike borge op Knysna en oorsee geïdentifiseer wat bereid is om van die toerusting te finansier. Op Knysna is so ‘n gimnasium in Mei vanjaar langs Cathy Park in George Rex-rylaan opgerig, danksy die nasionale departement van sport en rekreasie. Bosman wag vir terugvoer van die departement om ook in George so ‘n projek te finansier.
Indien die projek privaat gefinansier word, gaan George-munisipaliteit eers die groen lig moet gee alvorens toerusting opgerig kan word.
“Dit is die eerste hekkie waaroor ons moet spring,” het Bosman gesê. Volgens Bosman is ‘n vergadering by die stuk grond met munisipale verteenwoordigers vir gister (Woensdag 22 Julie) geskeduleer.
Die direkteur van gemeenskapsdienste, Walter Hendricks, het by navraag gesê die munisipaliteit verwelkom enige voorstelle om onwettige stortingsterreine te ontwikkel. “Die betrokke departement is besig om inligting oor alle rolspelers in te samel en sal direk met Bosman in verbinding tree,” het hy gesê. Wyksraadslid Cecil Noble het gesê die buiteluggimnasiumprojek geniet beslis sy ondersteuning en word reeds suksesvol in ander dorpe bedryf. Intussen hou Bosman die stukkie grond soos ‘n valk dop en skroom nie om oortreders te berispe wanneer hulle goedsmoeds hul vullis daar wil stort nie. “Dit is nie net inwoners van Andersonville nie, maar ook ouens van buite die woonbuurt wat kanse vat,” het hy gesê. “Hierdie is ‘n opvoedingstaak.”