Buiteluggimnasium steeds in Bosman se visier
'n Projek vir die gemeenskap in Andersonville wat deur die bekende langafstandatleet, Lloyd Bosman, gedryf word, is nog nie uit die wegspringblokke nie. Bosman, 'n inwoner van die woongebied, wil graag 'n oop stuk grond op die hoek van Reier- en Missionstraat in 'n buiteluggimnasium ontwikkel.
'n Ter plaatse vergadering is verlede Woensdag by die betrokke veld met munisipale verteenwoordigers gehou. Volgens 'n kommunikasiebeampte van George-munisipaliteit, Debra Sauer, is die sportafdeling steeds in bespreking met die rolspelers rondom die gebruik van die stuk grond en kan hulle nie in die stadium meer inligting bekendmaak nie. "Die George-munisipaliteit verwelkom egter die ontwikkeling en gebruik van die grond ten bate van die gemeenskap," het Sauer gesê. Bosman het die skoonmaak van die area, wat as 'n onwettige stortingsterrein gebruik word, gefasiliteer. Hope gemors en tuinvullis is met die hulp van Georgemunisipaliteit van die park verwyder. "Ek het steeds goeie hoop om met die hulp van ons wyksraadslid 'n gimnasium in Andersonville op te rig," het Lloyd gesê.