Polisievoertuig slaan om in nat Outeniquapas
Twee polisiebeamptes is Sondag 26 Julie met ligte beserings gehospitaliseer ná hul dubbelkajuitbakkie in die Outeniquapas omgeslaan het. Volgens Suid-Kaapse polisiewoordvoerder, kapt. Malcolm Pojie, ondersoek die polisie 'n saak van roekelose en/ of nalatige bestuur na aanleiding van die ongeluk wat omstreeks 08:30 Sondagoggend plaasgevind het.
"Die voorlopige ondersoek dui daarop dat die bestuurder van die polisievoertuig onderweg was na George toe hy in die Waboomskraalomgewing beheer verloor het. Die voertuig het op die nat pad gegly, omgeslaan en teen ‘n boomstomp tot stilstand gekom," sê Pojie. Beide beamptes, onderskeidelik van Conville en Thembalethu, is per ambulans na die hospitaal geneem waar hulle die nodige mediese behandeling vir rug- en nekbeserings ontvang het. Hulle is sedertdien ontslaan.