Blanco se Beckie Meyer oorlede op 95
Beckie Meyer, 'n bekende en geliefde inwoner van Blanco, is op Maandag
27 Julie in die ouderdom van 95 jaar oorlede. Gerrit Pretorius, haar skoonseun, het namens die familie gesê hulle onthou en vier haar lewe as 'n blymoedige, innemende en nederige mens.
"Ons neem met hartseer afskeid van ons liefdevolle ma, ouma en oumagrootjie. Sy was geheel en al onafhanklik. Sy het alleen gewoon en nog motor bestuur. Sy het nie 'n verjaarsdag vergeet nie. Sy was 'n ware mensch."
Meyer was steeds 'n getroue lid van die Blanco-Vroue-Landbouvereniging waaraan sy vir dekades verbonde was en onder meer as voorsitter gedien het. Sy was ook 'n erelid van die George-blommeklub.
Ds. Francois Mulder, 'n leraar van die NG Blanco-gemeente, sê Meyer was tot en met die aanvang van grendeltyd nog elke Sondag op haar plek in die kerk. "Noudat sy tuisgekom het by haar hemelse tuiste, is ek na byna 14 jaar in Blanco-gemeente dankbaar dat ek een van die Here se gunsteling-dogters mag ken."
Hy en Meyer het voor die erediens op 'n Sondagoggend 'n ritueel gehad. Sy was altyd die heel eerste gemeentelid om haar sitplek in te neem en die rustige atmosfeer in te drink wanneer die sanggroep om 08:00 begin oefen. Hy het dan weggeglip en haar met 'n drukkie en 'n geestige geselsie gaan groet. "Nou verlang ek na my kosbare oggendgroet met Ouma Beckie. Haar glimlag, haar opreg geïnteresseerde vrae, haar omgee, haar bemoediging." Meyer laat haar kinders, Lomine en
Gerrit, Hanna en Ferdinand, kleinkinders Nina en Peter, Albert en Inge, Pieterjan, Hellix, Debbi en Yentl, asook twee agterkleinkinders, Eli en Noa Rebecca agter.
Weens die inperking sal 'n privaat begrafnisdiens gehou word.