Geliefde Dr. Piedt swig voor Covid-19
‘n Groot boom het geval. ‘n Belangrike stem het stil geword. Vandag het die virus blatant van ons gesteel. Dit was van die onmiddellike reaksies op sosiale media nadat die skokkende nuus laat Maandagmiddag bekendgemaak is dat een van Oudtshoorn se groot leiersfigure, dr. David Piedt (80) oorlede is. Piedt, ook liefdevol onder inwoners bekend as “Stretch”, is verlede week weens Covid-19 in die Mediclinic Klein Karoo opgeneem. Hy is verlede Sondag na die Mediclinic George oorgeplaas. Bemoedigende nuus het egter oor die naweek die ronde gedoen dat Piedt se toestand aansienlik verbeter het. Volgens Piedt se vrou, Marjorie, was dit egter sy wat nooit die werklikheid in die oë wou staar nie.” Omdat ek hom nie fisies weens die Covid-19hospitaalreëls kon besoek nie, was ek gedurig met die susters en dokters in verbinding oor sy vordering. Die dokter het my Maandag om 16:30 reeds laat weet dat David se suurstofvlakke drasties geval het omdat die virus sy longe onomkeerbaar beskadig het. Dit het my vir ‘n oomblik geruk, maar ek het steeds gebid dat die Here hom moet herstel want ek kon my nie ‘n lewe sonder hom indink nie. Dit was die eerste keer sedert ons huwelik van meer as 40 jaar dat ons so lank van mekaar af was en die verlange op sy eie was verskriklik erg.” Marjorie sê dat sy tydens haar man se hospitaalopname uitsluitlik via stemnotas oor WhatsApp met hom gekommunikeer het. “Tydens ons gesprek het die dokter my ook gevra of daar enige iets is wat ek vir David wou sê.
Dis toe dat die werklikheid by my ingeskop het dat die einde naby is. Ek het dit aan sy hygende stem gehoor dat die dood stadig aan galop kom,” het sy haar laaste gesprek met David beskryf.
Marjorie het die tyding Maandag omstreeks 17:30 ontvang dat Piedt oorlede is. Piedt het sy onderwysloopbaan in die sestigerjare by Volkskerk Primêr in Hoogstraat begin. In 1978 is hy na Colridge
Primêr waar hy ook skoolhoof was. Piedt het in sy leeftyd op vele organisasies gedien en was in sy gemeenskap veral bekend as ‘n vurige vryheidsvegter, Afrikaanse aktivis, rugbyliefhebber en opvoedkundige spesialis.
Hy was een van die stigterslede van die KKNK en ook ‘n voormalige direksievoorsitter van dié fees. Hy is vroeër vanjaar deur Kunste Onbeperk vir sy bydrae tot die KKNK en die gemeenskap vereer. Volgens Marjorie sal die begrafnis in alle waarskynlikheid volgende week plaasvind. Die presiese reëlings sal later aan die media deurgegee word.
Piedt se twee dogters, Chê en Tracy is tans in die buiteland (Engeland en België) en weens die verbod op internasionale vlugte is die kanse groot dat hulle nie die begrafnis sal kan bywoon nie. Sherrilyn Lloyd, oudonderwyser en kennis van Piedt het sy nalatenskap op Facebook met die emosionele gedig beskryf:
Ons Meneer!
(David Piedt)
‘n Man so groot gaan vir laas hier verby
Dit roep gou ‘n traan moet gou daarteen stry
So helder ferm jou stem
“jou werk moet jy doen”
Elke woord soos ‘n lem
Sny deur kous en skoen
Somme en lewe
Is beide onderrig
Jy deel boek en land wat ons las verlig .....
Rus sag, groot leerkrag, jy’t ons lot versag.