Stompkopkewer as pes verklaar
Die stompkopkewer is nou amptelik as 'n pes verklaar. 'n Woordvoerder van die munisipaliteit het by navraag bevestig dat die kewer nou in terme van Wet nr. 36 van 1983, deur die departement van landbou, grondhervorming en landelike ontwikkeling as 'n amptelike pes verklaar is.
Die kewer en sy simbiotiese swam saai al sedert Mei 2018 verwoesting in die bosse en tuine van inwoners in die streek. Dit sluit plekke in soos Mosselbaai, George en Knysna.
Lesers het George Herald gekontak oor wat hul te doen staan, want van die bome staan op openbare grond en dan besmet dit skynbaar bome in inwoners se tuine. Volgens die woordvoerder van die Georgemunisipaliteit is vanaf verlede jaar plekke geïdentifiseer vir die storting van die reste van afgesnyde bome, maar dit was nie prakties nie en met die Covid-19-pandemie is die kwessie rondom die stompkopkewer 'n bietjie verwaarloos. Daar is nou 'n beter plek as stortingsterrein geïdentifiseer en samesprekings met die siviele ingenieursdienste en reinigingsafdeling sal plaasvind waarna 'n finale besluit geneem sal word. Die publiek sal via die media daarvan in kennis gestel word.
"Die uitdaging is om die afgesnyde hout, wat reeds met beide swam en boorders geïnfekteer is, nie na nabye areas te versprei nie," het die woordvoerder gesê.
"Die manier om dit veilig te doen is om die geïnfekteerde materiaal voor vervoer heeltemal toe te maak sodat spore, eiers en boorders nie uitwaai na omliggende areas terwyl die hout weggery word nie. Hierdie vind nie op die oomblik plaas nie en is ook moeilik om toe te pas."
Volgens die woordvoerder kan enige bome besmet raak. Die wind versprei die swamspore en 'n sterk wind kan ook die boorders en eiers versprei.