Ma verneder in kraamsaal
Die George-hospitaal het 'n interne ondersoek gelas nadat 'n vrou wat onlangs daar gekraam het, klagtes oor haar behandeling ingedien het. Silodia Jansen (33) sê asof die kraampyne nie genoeg was nie, moes sy met haar tyd in die hospitaal nog die pyn van verkleinering ook hanteer. Jansen sê sy het op 10 Julie geboorte geskenk aan haar vierde kind, 'n seuntjie by die George-hospitaal. "Wat veronderstel was om 'n vreugdevolle gebeurtenis te wees het vir my soos 'n nagmerrie gevoel," vertel sy. Die vrou is na bewering deur 'n verpleegster vertel hoe sleg sy is omdat sy reeds haar vierde kind op so 'n jong ouderdom baar. Sy meen elke swangerskap is anders, haar vorige bevallings was pynlik, maar niemand het op haar gegil of gevloek nie.
"Ek was reeds 5 cm ontsluit by my aankoms by die hospitaal. Die verpleegster het by die dokter oorgevat en dis waar alles begin het."
Jansen vertel sy was kort daarna tot 7 cm ontsluit en is deur die verpleegster gevra om te gaan urineer. "Ek het aan haar verduidelik dat ek nie kan loop nie, want ek kon die drukking van die baba voel. Die verpleegster het gevloek en ek het aangesukkel toilet toe." Jansen vertel die pyn was so erg, sy het na haar asem gesnak.
"In die badkamer het ek gevoel die baba wil kom, ek het opgespring en gewag tot die pyn weer bedaar. Die verpleegster het die badkamer deur oopgegooi en gesê ek moet verbykom en nie die kind hier moet afdruk nie want die mammas is lief om sulke k...k aan te vang."
Jansen sê terug op die bed kon sy voel die baba is naby en het die verpleegster geroep. "Ek het haar gevra hoekom sy so ongeduldig is, waarop sy geantwoord het dat ek besig is om haar tyd te mors want sy moet ander mammas ook help."
Jansen kla dat sy skaars na haar nuwe baba kon kyk voor die verpleegster aan haar begin druk het om die nageboorte uit te kry. "Die verpleegster het haar hand in my gedruk om die nageboorte te verwyder. Sy het aanhou krap en gesê ons kry te veel kinders dis hoekom ek so onophoudelik bloei. Ek het gehuil en gesmeek dat die verpleegster moet stop."
Daar is glo ook nie na haar geluister toe sy kla dat haar baba te rooi lyk nie. "Die dokter het agterna wel bevestig dat hy geelsug gehad het," het 'n ontstelde Jansen vertel.
Departement se kommentaar
Nadia Ferreira, 'n woordvoerder vir die Wes-Kaapse gesondheidsdepartement, sê hulle is jammer oor die pasiënt se negatiewe ervaring. "Ons kan bevestig dat 'n interne ondersoek tans gedoen word en die klagte sal hanteer word in lyn met ons interne tugprosedures waar nodig. Die hospitaal sal terugvoering aan die pasiënt gee na die ondersoek afgehandel is." Sy sê hulle moedig pasiënte aan om dadelik in kontak te kom met die operasionele bestuurder van 'n saal indien hulle ongelukkig is met die diens wat hulle ontvang - sodoende kan ongelukkigheid in meeste gevalle dadelik aangespreek word. Herold's Bay resident Silodia Jansen (33) is very unhappy with the humiliating treatment she claims to have received from a nurse at the George Hospital during the birth her son earlier this month. An investigation by the health department is in process and will be handled in accordance with internal disciplinary procedures.