Tuinroete of Gemorsroete?
B Erasmus, Groot-Brakrivier:
Ons sê ons bly in Eden en aan die Tuinroete. Stel u nou in ‘n Europese toeris se skoene. U sit in ‘n toerbus en is op pad deur Eden met die Tuinroete - wat sien u?
Ons begin by Mosselbaai. Langs die N2 begroet die mees vieslikste en uiters onhigiëniese vark- en beeshokke skaamteloos die toeriste. Die stank is bykans ondraaglik.
Ry ons verder by Powertown verby waar alles redelik aan die kant is, behalwe vir die ou groot gebou wat daar staan en al lankal gesloop moes gewees het. Die tuinroete verder is heel aanneemlik en mooi met die huise aan die een kant en pragtige landerye en berge aan die ander kant. Die dorpie Groot-Brakrivier is heel skoon en netjies. Na Groot-Brakrivier is alles mooi en netjies, behalwe vir ‘n plastiekbottel of plastieksak wat plek-plek by ‘n motorvenster uitgegooi is. So hier en daar ry mens ook by ‘n baie onnet plaasopstal verby.
Nou deur George. Onthou nou ons Europese toeris kom uit ‘n omgewing waar daar nie eers ‘n stompie in die strate te bespeur is nie en langs hulle nasionale paaie is alles silwerskoon en netjies.
Die N2 loop nou deur George en wat ‘n gemors. Die draadheining is verwoes en dis net hope gemors al langs die pad en langs die huise. Dit is tonne plastiekbottels, plastieksakke, hope papier en blikke. Ja noem dit gemors en dit lê daar ten aanskoue van elke toeris.
Ons sê ons bly in Eden aan die tuinroete. Ons het in een van die mooiste streke van ons land gebly, maar ons het dit verwoes, bevuil en bemors. Ons is hoegenaamd nie teenoor ons Skepper eers jammer dat ons Sy tuin, Eden, so bemors en verwoes nie. Van ‘n skande en skaamte teenoor ons Skepper en toeriste is daar nie sprake nie en ook geen verantwoordelikheid nie. Sies!!!
Wil die George-gemeenskap nie ‘n projek oorweeg om die graswalle langs die N2 deur hulle dorp met aalwyne te beplant nie? Ek wil ‘n beroep op die Wes-Kaapse regering doen om die area te herdoop na Vullishoop op die Gemorsroete.