Soldoedies van 1971 loop na 50 jaar terug op ou spore
Hulle is van George se bekendste oudinwoners en volgende jaar is hulle van voorneme om weer terug te keer na die plek waar hulle saam baie vreugde en swaarkry beleef het. Dis die dames wat in 1971 geskiedenis gemaak het toe hulle by die Burgerlike Beskermingskollege (later verander na die SA Leërvrouekollege) aangemeld het. Later het hulle algemeen bekendgestaan as die ‘soldoedies’ en oral in Suid-Afrika het mense van hulle geweet. Destyds het 128 vroue aangemeld. Vir 23 jaar was die vroue in uniform deel van George en omgewing.
Arina Jooste, die koördineerder van die reünie, het gesê die oudstudente van 1971 hou dit spesifiek in George om weer op hul ou spore te stap. “Ons was die pioniers wat die weg gebaan het vir die meisies na ons en dan ook spesifiek vir die vroue in die weermag. Meeste van ons is naby 70 jaar oud en dit mag dalk die laaste reünie saam wees.” Sy was self ‘n lid van daardie eerste groep.
Die reünie word van 4 tot 6 Mei 2021 by die Wilderness Hotel gehou. Daar sal onder meer 'n besoek gebring word aan die destydse kollege wat deesdae die Tuinroetedistrikshoofkantoor van die polisie huisves. Dit was destyds 'n nuwe konsep en 'n baie uitdagende taak. Min het hulle geweet watter reusestap dit was om vroue toe te laat om in die weermag te dien. Die departement van openbare werke het 'n afgeleefde en ontruimde huishoudskool beskikbaar gestel wat in 'n paar maande omskep moes word om te voldoen aan militêre standaarde. Nuutaangestelde vroueoffisiere en studente kon dus vanaf begin Februarie 1971 daar gehuisves word.
Wat bygedra het tot entoesiasme by die personeel en studente was wyle Elize Botha, eggenote van die toe dienende minister van verdediging, PW Botha, se belangstelling en voogdyskap. Botha, as minister van verdediging, het later die amptelike opening van die kollege waargeneem.
Die opleidingskursusse was uitsluitlik gebaseer op burgerlike beskerming wat ingesluit het noodhulp (nasionale gradering), selfverdediging, telekommunikasie, tikvaardighede asook bestuur- en onderhoudsopleiding (van groot passasiersbusse, ambulanse, vragmotors en sedanvoertuie). Leierseienskappe is verder ontwikkel en liggaamlike opleiding het ook aandag geniet. Dril, as basis van dissipline, was deel van die daaglikse roetine. Volgens Jooste het die gemeenskap oor die jare 'n belangrike rol in die bestaan van die kollege gespeel. So byvoorbeeld het van die inwoners destyds as ‘pleegouers’ vir die studente wat ver gebly het, opgetree. Die kollege het ook vir George ‘n groot finansiële inspuiting gegee. Die kollege is in 1998 in George gesluit en geïntegreer met die Leërgimnasium in Heidelberg, Gauteng. Volgens Jooste is alle aanduidings dat meer as die helfte van die oudstudente dit gaan bywoon - baie saam met hul eggenote. Slegs enkele oudstudente is nog nie opgespoor nie. Hulle kan haar e-pos by joosteja@mweb.co.za.