Susterkoerante span kragte saam
Toe Bob Dylan sy trefferliedjie, The Times they are a-Changin' in 1964 vrygestel het, sou hy, hoe profeties die titel ookal was, nooit kon raai dat 'n virus die wêreld in 2020 só sou verander nie. Covid-19 het, soos in ander sektore van die ekonomie, ook die media 'n gevoelige knou toegedien.
Hier te plaatse het gemeenskapkoerante in die Group Editors-stal nie ongedeerd daarvan afgekom nie, hoewel die gety aan die draai blyk te wees.
Lesers van die Knysna-Plett Herald en George Herald sou opgelet het dat daar vir etlike uitgawes, sedert die nasionale ramptoestand in Maart aangekondig is, 'n streekkoerant verskyn het. Hierdie uitgawes was 'n gesamentlike poging deur die George Herald, Knysna Plett Herald,
Mossel Bay Advertiser, Suid-Kaap Forum, Oudtshoorn Courant en Graaff-Reinet Advertiser.
Aanpassings
Soos die ekonomie stadig heropen het in vlak 3 van die nasionale inperking, was 'n groot ligpunt dat die koerante weer stelselmatig hulle eie identiteit kon begin terugkry.
Dit beteken egter dat dit steeds noodsaaklik vir twee-twee titels is om hul kragte saam te span, soos in die geval van Knysna-Plett Herald en George Herald. Hoewel die koerant 'n prioriteit bly, kan nuus ook aanlyn gevolg word. Webtuistes is ook die ideale plek waar foto's en video's gedeel kan word, om nie net landswyd nie, maar ook wêreldwyd te kan geniet.