Swak diens en oorvol mobiele toilette te erg vir Syferfonteiners
Die gemeenskap van Syferfontein sê hulle sal liewer 'n vorige diensverskaffer van mobiele toilette wil terughê as om nog 'n dag te sukkel met Moreki Distributors se swak diens.
Daar is aan George Herald gesê dat hul mobiele toilette nou net een keer in plaas van twee keer gediens word en dat daar elke week verby dié ry toilette gery word. Dit is een groot gemors.
James Smith, 'n gemeenskapsleier, sê daar is voorheen 'n langer pyp gebruik om by die toilette uit te kom. Hy meen toe was daar nie klagtes nie. Smith sê ook dat mense graag 'n toilet van hul eie wil hê, veral gedurende dié tyd. Hy noem ook dat daar mense is wat heel agter in die informele nedersetting woon en ver moet stap om by 'n toilet uit te kom. "So jy kan nie mense blameer as hulle toilette geskuif het tot in hul erwe of net nader nie."
Smith sê Moreki het blykbaar voorheen vroue van Syferfontein aangestel om die toilette skoon te maak, maar hy weet nie of daardie reëling steeds geld nie.
George-munisipaliteit
Moreki Distributors het George Herald na die munisipaliteit verwys vir kommentaar aangesien hulle as diensverskaffer nie met die media mag praat nie.
Charles Lubbe, direkteur van menslike nedersettings, George-munisipaliteit, het gesê 'n inwoner van Syferfontein het Maandag met hul menslike nedersettings direktoraat kontak gemaak oor die spesifieke probleem. "Die inwoner het ons amptenaar meegedeel dat daar 'n ry huise is wat elke keer oorgesien word wanneer die ander chemiese toilette gediens word. Die amptenaar het onmiddellik met die verskaffer kontak gemaak om dit onder sy aandag te bring en mee te deel dat die praktyk onaanvaarbaar is en dat dit onmiddellik aangespreek moet word."
Lubbe sê Maandag was die eerste keer dat enige probleme rakende die diens van toilette in Syferfontein onder hul aandag gebring is. Hulle het ook met die diensverskaffer, Moreki Distributors, kontak gemaak. "Volgens die verskaffer het hulle 'n probleem met die spesifieke ry toilette aangesien die pad nou is en hul voertuie nie behoorlike toegang tot die toilette het nie. Hulle moet blykbaar voertuie omruil en 'n kleiner voertuig wat gewoonlik op 'n ander gebied werksaam is, na Syferfontein teruggeroep om die gedeelte te diens." Hy sê die verskaffer is egter gewaarsku om die nodige dienste in plek te kry, want dit is 'n tendervereiste.
Lubbe sê hul amptenare sal daadwerklike pogings aanwend om na die toeganklikheid van die pad te kyk.