Pandemie staan nie in vroue se pad
Vrouedag is vanjaar onder ander omstandighede gevier, maar daar is steeds erkenning gegee aan die belangrike rol wat vroue in die samelewing speel.
Rosina Ruiters, onderburgemeester van die Garden Routedistriksmunisipaliteit, het gesê Covid-19 het wel 'n invloed gehad. "Ons moes kleiner gaan sodat sosiale afstande gehandhaaf kon word." Geskenkpakkies is van deurtot-deur by bejaarde vroue afgelewer en waar moontlik is kleiner byeenkomste ook vir jonger vroue gehou. Die vroue is veral bemoedig om hul plek in die samelewing in te neem. As gevolg van die pandemie is besluit om vanjaar Vrouedag nie net op 9 Augustus te vier nie, maar oor die hele maand. Volgens Ruiters word vroue op die verskillende regeringsvlakke gesien as ’n man se eweknie, maar in die gewone samelewing word daar steeds teen vroue gediskrimineer. Dit vind plaas op beroepsvlak en geweld teen vroue kom ook voor. Daar word gekyk hoe vroue bemagtig kan word. Volgens Blanche Benjamin, omgewingsaktivis van Pacaltsdorp, word daar gewoonlik 'n geleentheid gehou, maar vanjaar moes aanpassings gemaak word. Onderling het vroue in klein groepies bymekaargekom om mekaar op te beur. Vroue word steeds nie regtig raakgesien nie en daar is nog 'n lang pad wat geloop moet word. Mishandeling van vroue moet ook hokgeslaan word.
Dr. Adele Potgieter, voorsitter van die ouditkomitees van die Georgemunisipaliteit en die Garden Routedistriksmunisipaliteit, het gesê vrouwees moet elke dag gevier word. Omstandighede mag nie bepaal hoe iemand 'n dag deurbring nie.
Sy het vanjaar steeds Vrouedag gevier. "Ek het 'n lieflike dag saam met my ma van 84 jaar en my familie deurgebring. Selfs by die huis kan mens Vrouedag vier. My ma is die rots in my lewe. My ma is die fondament vir alles wat ek vandag is." Charlotte Clarke, Georgeonderburgemeester, het gesê Vrouedag was vanjaar anders. Sy het die dag beroepsverpligtinge in haar hoedanigheid as onderburgemeester gehad. "Dis goed dat die fokus val op die belangrike rol van vroue in die samelewing. Alles begin in die huis waar vroue self 'n voorbeeld kan stel. As vroue mekaar ondersteun, gebeur daar wonderlike dinge. Een van die dinge wat baie moed verg, is vir 'n vrou om haarself te identifiseer. Weet wie jy is, glo in wat jy kan vermag en waarheen jy op pad is."
Clarke sê vroue is sterk genoeg om enigiets in die gesig te staar, al voel dit soms nie so nie. Haar boodskap aan al die klein dogtertjies, "Jy moet nooit twyfel in jouself nie. Jy is spesiaal en verdien 'n kans en geleentheid in die wêreld om jou drome na te streef."