Verkeersvrou heldin met veggees
"Ons is so dankbaar sy leef, want toe ons die nuus kry ... ek het mal geword. Dinge kon so anders uitgedraai het." Só vertel Rochelle Bergman, die ma van die provinsiale verkeersbeampte wat verlede Vrydagoggend geskiet is. Janneké (29), self 'n ma van 'n 2-jarige dogtertjie, is twee keer geskiet, eers in die knie en toe in haar linkerwang. Die koeël deur haar wang is uit deur haar nek, net bokant haar skouer. Nes haar ouers, beskryf kollegas Janneké as 'n stil mens wat 'n groot passie vir haar werk het.
"Sy is pligsgetrou en 'n heldin. Sy het 'n veggees in haar wat ek nog nooit gesien het nie. Selfs nadat sy geskiet is, was die stryd vir haar nie verlore nie. Sy het bloeiend in die pad gelê en steeds probeer terugveg deur haar vuurwapen uit te haal om haar aanvaller te skiet, maar sy kon nie genoeg krag bymekaar skraap nie," het een kollega vertel.
Janneké het volgens die Bergmans twee van haar kollegas gaan bystaan nadat hulle 'n silwerkleurige Audi A4 in Beachweg, op die brug oor die N2-snelweg naby Stanmar Motors, afgetrek het. Terwyl die beamptes besig was om die verdagte, Bonginkosi Ndevu (28), te boei, het 'n struweling ontstaan waartydens hy 'n vuurwapen uitgepluk en Bergman geskiet het. Ndevu is kort daarna, met die boeie steeds om sy een gewrig, deur die polisie geskiet nadat hy op hulle losgebrand het terwyl hulle hom agternagesit het.
Chantal, Janneké se ouer suster, het vandeesweek gesê Janneké ervaar steeds baie pyn en sou Woensdag (gister) 'n tweede operasie ondergaan. Vrydagaand is haar linkerknie geopereer en gister haar regterenkel wat gebreek is.
"Maar andersins gaan dit beter met haar. Dis vir ons moeilik want ons kan haar nie in die hospitaal besoek nie, maar ons video call gereeld. Dit wat gebeur het, is vir ons as familie 'n groot skok, ook vir haar verloofde, maar ons staan sterk ter wille van my ouers," sê Chantal.
Janneké en haar verloofde, Grasto Seconds, het planne om later vanjaar te trou.
Die Wes-Kaapse minister van vervoer en openbare werke, Bonginkosi Madikizela, het ook die Bergman-familie die afgelope naweek by hulle woning besoek en sy woede oor die voorval uitgespreek. In 'n onderhoud met George Herald het Madikizela die sinnelose aanval skerp vooroordeel. "Wanneer 'n mens hoor dat een van die mense wat vroeg opstaan om seker te maak ons is veilig op die paaie geskiet word ... die manier waarop dit gebeur ... ek dank God sy lewe en is stabiel," het Madikizela gesê.