Paramedikus sterf aan Covid
Die eerste paramedikus van EMS in George, wat sy lewe weens die koronavirus verloor het, is Saterdagoggend in die George-hospitaal oorlede.
Hy was die 47-jarige Winston Lee. Volgens sy bestuurder, Cedric Yantola, het Lee jare gelede as vrywilliger by EMS begin werk en was hy die afgelope 15 jaar 'n werknemer daar. "Hy was 'n toegewyde persoon en altyd gewillig om die ekstra myl te stap. Hy was 'n goeie spanspeler en het nooit gekla oor enigiets wat hy moes doen nie. Sy afsterwe laat 'n groot leemte in ons geledere," het Yantola gesê. Volgens Yantola was Lee die tweede paramedikus in die Tuinroete wat EMS aan Covid-19 afstaan. Die ander lid was van Heidelberg.
Lee se susterskind, Clinton Lee, het aan George Herald gesê sy oom was 'n onbaatsugtige persoon. "Hy het 'n vriendelike, innemende geaardheid gehad. Sy optrede was altyd waardig en hy was altyd behulpsaam en toegewend. Hy was 'n Georgiet in murg en been en het aan Hoërskool George gematrikuleer." Volgens Clinton was sy oom verlede week heel week siek. "Hy het gedink dat hy 'n gewone griep onder lede het, maar teen die einde van die week het hy asemhalingsprobleme ontwikkel en is Vrydag in die hospitaal opgeneem. Hy is Saterdagoggend oorlede." 'n Herdenkingsdiens is Dinsdag 8 September, vir Lee gehou. Sy kollegas het hom vereer deur in 'n konvooi verby sy huis te ry waar blomme aan die familie oorhandig is.
Lee laat sy ouers, Frederick en Magdelene Lee, sy vrou Nyleen, vier kinders, Logan, Faith, Ceana en Lliam, asook twee broers en twee susters agter.