Mond- en Voetskilders sluit dalk hul deure
Die Suid-Afrikaanse Vereniging van Mond- en Voetskilders, met hul hoofkantoor in George, staar 'n onseker toekoms in die gesig en kan moontlik hul deure sluit. Die nie-regeringsorganisasie (NGO) is onder groot finansiële druk as gevolg van die Covid-19-inperkingsmaatreëls.
Die organisasie is afhanklik van bydraes van die publiek en die verkoop van lede se kunswerke.
Hulle bestaan al sedert 1958 en het byna agt jaar gelede hul kantore van Kempton Park in Gauteng na George hervestig. Tot in Junie/Julie het hulle 'n winkel op Hartenbos gehad, maar moes dit sedertdien sluit. Hulle moes ook van hul toerusting verkoop en sukkel om hul maandelikse verpligtinge na te kom. Vyf personeellede het reeds hul werk verloor, terwyl net enkeles nou help met die bedryf van die organisasie.
Belinda de Klerk van die organisasie sê 24 kunstenaars is afhanklik van die organisasie vir hul inkomste. As hulle moet sluit sal hulle nie meer 'n platform hê om hul kunswerke te verkoop nie. "Daar is 'n groot moontlikheid dat ons sal moet toemaak. Dit sal beteken alle aktiwiteite sal staak."
Van die bates wat hulle reeds moes verkoop is masjiene wat van die kunswerke reproduseer en gebruik word om afdrukke mee te maak.
Dit skep onsekerheid en dit is nie net die kunstenaars wat geraak word nie, maar ook hul families en afhanklikes.
Patrick Botto, (49) 'n lid van die Mond- en Voetskilders het gesê die jongste gebeure is 'n groot bekommernis.
Botto kom oorspronklik van Grabouw. Later het hy in Pretoria as 'n vingerafdrukdeskundige by die polisie gaan werk. Op 12 November 1993 het sy lewe vir altyd verander. Hy en sy kollegas het van 'n jaareindfunksie teruggekeer en was in ’n motorongeluk betrokke. Een persoon het in die ongeluk gesterf en Botto het sy nek gebreek.
Hy het met sy mond leer skilder en dit het nuwe deure vir hom oopgemaak. Sy paaie het in 1998 met die organisasie gekruis en in 2000 is hy as student aangestel. Hy het hom verlede jaar permanent in George kom vestig. Op die oomblik het hy baie vrae. "Mens vra jouself hoe gaan jy hierdeur kom." Maar hy vertrou op die Here.
Hy is afhanklik van die inkomste. "Die organisasie het my baie gehelp. My ontmoeting met hulle het my lewe verander en my finansieel gehelp. Ek het verpligtinge en het verlede jaar onder meer 'n huis gekoop. Dis 'n baie hartseer situasie."
The Association of Mouth & Foot Painters South Africa, whose head office is in George, may have to close its doors. The association is under financial pressure due to Covid-19 regulations.