Menslikheid in aksie
Bonny Brink-Lawrence, entrepreneur en menslike diversiteitsaktivis, George:
Die Covid-19-pandemie het die meeste mense en besighede en ons almal hard getref, maar ook die ongelykheid in ons gemeenskappe beklemtoon.
Daar is dringende, sigbare nood, veral in die mees kwesbare areas van George. Hierdie gevalle word veral uitgeken aan toestande soos werkloosheid, die styging in misdaad, mense wat krepeer van honger, oorvol staatsklinieke, behuisingsnood en swak dienslewering deur staatsdepartemente. Dit maak die lewens van die mens wat spartel vir oorlewing uiters ondraaglik.
Feitlik alle sektore van die Georgeekonomie is negatief beïnvloed soos byvoorbeeld toerisme, landbou, kleinsakeondernemings, ens.
Daar is tans pogings deur plaaslike munisipaliteite, nie-regeringsorganisasies en ander organisasies om prosesse in plek te stel om die uitdagings in ons stad aan te spreek, hoewel daar tot op datum per dokumentasie en realiteitstudies bewyse is dat daar nie genoeg gedoen is om hierdie tekorte aan te spreek nie.
Met al die lewensvernietigende sosiale, ekonomiese en etiese uitdagings in George, na sewe jaar van my burgerskap, glo ek die tyd het aangebreek vir ons as burgers van George om ‘n nuwe, doeltreffende samelewing te skep.
In hierdie verband kan ons gebruik maak van die kennis en insigte van lande waar hierdie sisteme suksesvol geïmplementeer is, asook my eie ervarings opgedoen, wat tot voordeel van die ontwikkeling van 'n nuwe era kan wees. In hierdie nuwe samelewing sal vooropgestelde agendas en selfverryking ten koste van ander se agteruitgang geensins geduld word nie. Eerlike, gewone gemeenskapslede met integriteit sal eienaarskap neem van hierdie nuwe samelewing. Dit sal ‘n platform skep met perspektief van opregte, tasbare en verantwoordbare oplossings sodat ons stad van George betekenisvol en volhoubaar kan wees vir die inwoners.
Vir enige insette en kommentaar e-pos asseblief bonny@bblgcorp.co.za.