Fortuin beywer hom vir leeskultuur
Met die viering van nasionale boekeweek is dit net gepas om melding te maak van Lionel Fortuin van Pacaltsdorp se eerste boek.
Die boek, 'n bundel kortverhale genaamd 'n Kykie vanuit die Oude Doos, is geïnspireer deur Fortuin se kleindogter, Zoë Bhana. Fortuin sê tydens grendeltyd het hy haar gevra om haar eie boek te skryf. "Dit het sy sommer in een oggend gedoen. My vriend en boekillustreerder het dit toe moontlik gemaak dat haar storie in boekvorm kon verskyn. Dis toe dat ek besluit het, maar hoekom nie ek ook nie."
Hy vertel sy skryfwerk het meer as 30 jaar gelede begin met 'n paar gediggies en verhale wat hy geskryf het. Uit Fortuin se ervaring as Afrikaans-onderwyser het hy geleer jongmense lees moeilik en dus bly letterkunde 'n probleem. "Hulle wil nie self lees nie, sal liewer dat jy voorlees en dan wil hulle daaroor eksamen gaan skryf." Destyds het hy begin om verhale te skryf waarmee jongmense kan identifiseer. "Dis hoe ek begin het om alledaagse stories in verhale te omskep. In die 80’s het ek 'n verhoogdrama rondom MIV/vigs geskryf vir 'n kompetisie van die departement van gesondheid en my skool het gewen."
Hy sal graag met sy boek 'n liefde vir lees onder jongmense asook die ouer geslag wil kweek.
Fortuin sê hy beplan reeds sy volgende bundel kortverhale, maar glo dat verhoogstukke goed daarby inpas. "Ek sal graag meer wil bereik en doen soos die leeskultuur uitbrei en sal werk dat dit meer deel van die kurrikulum word." Fortuin sê hy dink vandag se jongmense vind dit moeilik om te lees omdat die verhale nie in hul omstandighede gebeur nie. In sy ervaring sal jongmense se skryfstyl beperk bly omdat hul leeservaring beperk is. Hy sê om aan te sluit by die titel van sy boek, glo hy as daar meer gefokus word op taalreëls soos in vroeër jare, sal lees makliker word en almal se woordeskat verryk. Fortuin sê sy boek is beskikbaar by vyf nasionale biblioteke, dit sal goed werk as voorgeskrewe boek en vorentoe gaan die boek op Amazon.com beskikbaar wees, maar nou kan mense hom direk kontak vir 'n kopie. Hy is dankbaar vir die wonderlike span wat saamgewerk het om die boek uit te bring, soos die omslagontwerper Gezwill Percy, Austan Claassen wat sy illustrasies gedoen het en Charissa Patrick het gehelp met redigering asook Knysna Press vir die druk van die boek.