‘Kinders het grense nodig’
As 'n plaasseun van Vleesbaai wat self onder moeilike omstandighede grootgeword het, gryp Hoërskool George-onderwyser Keenan Moses (30), elke geleentheid aan wat na sy kant toe kom. Moses het onlangs met broodnodige navorsing sy meestersgraad in opvoedkundige sielkunde deur Unisa verwerf . "Ek word gedryf deur die wil om sukses te behaal in alles wat ek aanpak. My vrou en dogter inspireer my om 'n verskil in ander se lewens te maak, veral die leerders wat ek onderrig."
Moses se navorsingstudie en skripsie was oor hoe gebrekkige leerderdissipline verskillende vorme aanneem.
"Alle kinders het grense nodig om optimaal te groei en leer. Baie leerders in voorheen benadeelde skole word groot sonder grense. Hulle word groot in omgewings waar hulle blootgestel word aan dwelms, geweld, misdaad en bendes. Hierdie ongestruktureerde omgewing veroorsaak baie dissiplinêre probleme omdat leerders nie die nodige selfdissipline aanleer nie," verduidelik Moses. Hy glo die rol van skole en opvoeders in die vestiging van grense en aanleer van selfdissipline is uiters belangrik omdat sommige leerders nie in ander omgewings leer watter gedrag moreel en sosiaal aanvaarbaar is nie. "As 'n opvoeder in my agste jaar by 'n voorheen benadeelde skool, het ek gevind dat die dissiplinêre probleme waarmee ek binne die skool te doen kry oor die afgelope paar jaar drasties toegeneem het. Na gesprekke met ander opvoeders het ek afgelei dat meeste opvoeders sukkel om dissipline te handhaaf." Hy sê as onderwyser voel jy alleen as jy sukkel met dissipline, veral as 'n jonger opvoeder. Volgens hom berei tersiêre instellings ’n mens nie noodwendig voor vir die stryd teen gebrekkige dissipline nie en die studie is ook daar om opvoeders te help besef dat hulle nie alleen is nie.
"Dit was vir my ook belangrik om 'n stelsel te vind wat hierdie probleme kan bekamp sodat alle leerders kan baat by die opvoeding- en leerproses."
Hy het bevind dat gebrekkige leerderdissipline verskillende vorme aanneem. Sy navorsing wys dit sluit 'n gebrek aan respek, ontwrigtende gedrag, afknouery, geweld, dwelmmisbruik en akademiese oneerlikheid in.
"Hierdie vorme van gebrekkige leerderdissipline word veroorsaak deur
'n gebrek aan ouerbetrokkenheid, gemeenskapsinvloede, die afskaffing van lyfstraf, oorvol klaskamers en gebrek aan opvoederondersteuning. Alle inligting uit my navorsingstudie dui daarop dat die rol van opvoeders, ouers, die gemeenskap en selfs leerders, uiters belangrik is by die aanspreek van gebrekkige dissipline." Hy sê belanghebbendes moet saamwerk en mekaar ondersteun om gebrekkige leerderdissipline aan te spreek.
As jy meer wil lees oor Moses se bevindings, besoek http://uir.unisa.ac.za/ handle/10500/26455