Lewer jou insette oor ekonomie
Inwoners word genooi om insette te lewer oor hoe om die ekonomie van George te herstel nadat vlak 1 inperking vanaf Maandag van krag is. George-burgemeester, Leon van Wyk, bygestaan deur Dirk Wessels, burgemeesterskomiteelid vir finansies en ekonomiese ontwikkeling, het in 'n onderhoud met George Herald die pad vorentoe bespreek.
Beide Van Wyk en Wessels is dit eens dat uitdagende tye wag. Van Wyk het gesê die plaaslike ekonomie het erg seergekry en die fokus is nou op werksgeleenthede, veiligheid, waardigheid en gesondheid.
Die George-munisipaliteit speel 'n fasiliteringsrol en kyk byvoorbeeld hoe om bestaande geleenthede in die ekonomie aan te wakker. George het unieke voordele soos dat pendelaars nie in swaar verkeer hoef te sit nie 'n pluspunt vir beleggers. Covid-19 se eerste uitdaging was hoe om die pandemie uit 'n gesondheidsoogpunt te hanteer.
Die fokus verskuif nou na ekonomiese herstel. Die syfers wys dat 'n moeilike paadjie wag. Na raming was daar in Suid-Afrika gedurende April een uit elke drie persone wat nie 'n werk gehad het of nie betaal is nie. Die ekonomie in die Wes-Kaap het met 13,6% gekrimp en werksgeleenthede het met 10,1% gedaal. In die Tuinroete was dit nog erger. Daar word gewerk aan planne en veral drie sektore kry aandag: toerisme, konstruksie (voorsiening van infrastruktuur) en die informele ekonomie. Terwyl die landbousektor produksie kan verhoog, sal huishoudings ook aangemoedig word om groentetuine te vestig. Van Wyk het benadruk vinnige, daadwerklike optrede is nodig om te keer dat ongelykheid toeneem. Wessels het gesê toegang tot die ekonomie moet vergemaklik word. Toerisme is 'n belangrike ekonomiese dryfveer en behels 'n wye verskeidenheid vertakkinge soos avontuursport en mediese toerisme. Mense kom na die gebied omdat hier goeie mediese sorg is en benut dan ook die toerismegeleenthede van die gebied. Lesers wat insette wil lewer of uitdagings en geleenthede wil bespreek kan e-posse stuur na supportbusiness@ george.gov.za.