Suster ontslaan ná 55 dae in hoësorg
Die 64-jarige suster het Maandagoggend by haar huis in Parkdene 'n warm verwelkoming van familie en vriende gehad nadat sy uit die S pes c are-rehabilitasiesentrum ontslaan is, bykans drie maande nadat sy weens Covid-19 in die Mediclinic George opgeneem is. Titus vertel sy het op 6 Julie begin siek voel en is in die George-hospitaal opgeneem. Enkele dae later moes sy op 'n ventilator geplaas word. Sy is vir 55 dae in die hoësorgeenheid behandel. "Die meeste van die tyd was ek in 'n koma en het nie geweet wat rondom my aangaan nie, maar toe ek bykom wou ek net huis toe gaan. Ek was gefrustreerd, want ek kon nie verstaan hoekom dit met my gebeur het nie. As voorste linie werker hete k al die voorsorgmaatreëls toegepas. Maar ek het altyd hoop gehad dat ek weer by die hospitaal sou uitstap."
Sy is drie weke gelede na Spescare vir rehabilitasie. Titus moet nou steeds 'n suurstofmasjien byderhand hou, want sy raak kortasem wanneer sy te veel beweeg, maar sy is dankbaar om tuis te wees, sê sy.
Titus se loopbaan van 38 jaar as verpleegkundige het in 1975 by die Somerset hospitaal begin, vanwaar sy hierheen verhuis het om in 1985 in die George-hospitaal se kraamsaal te begin. Sy was tweede in bevel daar. "Ek het net voor my uittrede in Julie siek geword. My verjaarsdag was op
17 Julie. Toe ek wakker word in die hospitaal en vir die verpleegster sê my verjaarsdag is mos komende Vrydag, moes ek hoor dat my verjaarsdag al verby is. Ek wil net sê hoe goed die Here is. Ek kan Hom nie genoeg bedank nie. Soveel mense het vir my gebid, selfs onbekendes wat van my gehoor het, en hulle gebede het my deurgedra. Nou gaan ek eers net daarop fokus om heeltemal gesond te word."
Sy waarsku mense om nie uit te stel om dokter toe te gaan wanneer hulle begin siek voel met Covid-19-simptome nie. "En wees versigtig, was jou hande, dra jou masker en hou die regte afstand van ander mense."