Oudraadslid sorg steeds vir ‘spice’
'n Voormalige raadslid van Georgemunisipaliteit, Mercia Draghoender, staar 'n klag van diefstal in die gesig. Draghoender het na bewering twee pakkies speserye ter waarde van R20 by 'n vleishandelaar, Butcher's Corner in George Industria, gegaps. George-polisie ondersoek tans die diefstalsaak wat verlede Woensdag,
7 Oktober, geopen is. Draghoender het boonop twee weke gelede die nuus ontvang dat die SAC-party wat sy in die George-raad verteenwoordig, gederegistreer is. Slegs 'n week later loop sy haarself vas in die speseryrak. Draghoender het gister gesê sy is "in 'n toestand" oor die diefstalklag teen haar. "Ek kan nie glo dit het gebeur nie.
Dit is 'n nagmerrie," het sy gesê. Draghoender het die bestuurders van die besigheid verlede week gaan sien en hulle gesmeek om die klag terug te trek. Sy het blykbaar op pad huis toe, na haar aankope, agtergekom sy het die speserye in haar roksakke gesit. "Ek het groot geskrik. Ek het nie geweet wat om te maak nie, toe gee ek dit maar vir my susters wat saam met my gery het," het Draghoender gesê. "Ek was verbouereerd. Ek weet nie wat my op daardie oomblik besiel het nie." Volgens een van die bestuurders van die onderneming was die voorval geensins 'n ongeluk nie.
"Ons het die beeldmateriaal gesien. Sy het presies geweet wat sy doen," het hy gesê.
"Dit is wel net R20 se speserye, maar dit gaan oor die beginsel van die saak. Dit maak nie saak wie dit is nie, as ons jou vang dat jy steel gaan ons 'n saak maak."
Die kassiere het blykbaar 'n gedeelte van een van die speserysakkies by Draghoender se roksak sien uitsteek. "Die kassiere was eers nie seker of sy reg gesien het nie, maar ons kon dit later verifieer met die videomateriaal," het een van die bestuurders gesê.
Die dag van die voorval het Draghoender sopbene en ander items ter waarde van R230 gekoop. Sy het die volgende dag teruggekeer en nog 'n klomp hoender by dieselfde plek gekoop.
"Ek koop al jare en jare by die winkel," het Draghoender gesê. "Ek het al baie kliënte na hulle verwys, maar nou ja. Ek wens hulle kon iets vir my gesê het terwyl ek daar was, dan kon ek dit onmiddellik regstel."
Ek kan nie glo dit het gebeur nie. Dit is ‘n nagmerrie.