‘Net sy straf sal ons vrede bring’
Net die straf van die verantwoordelike party, sal vir die familie van Nicolene Scheepers (40) van Pacaltsdorp vrede bring ná sy die afgelope naweek so skielik uit hul lewe weggeruk is. Scheepers en Ismail Fernol (45) is in die vroeë oggendure van Saterdag 10 Oktober in 'n ongeluk in Beachweg oorlede, nadat 'n donkerkleurige Polo in hul Toyota Tazz vasgejaag het. Fernol het die Tazz bestuur. Scheepers se suster, Emmerentia Jansen, was ook in die Tazz. Sy is na die hospitaal geneem vir mediese behandeling en is intussen ontslaan.
Kapt. Malcolm Pojie, die Suid-Kaapse polisiewoordvoerder, het vroeër gesê daar was vier insittendes in die Polo, twee mans en twee vroue. Die twee vroue en ‘n man (passasier) is na ‘n hospitaal geneem en na behandeling ontslaan. Die bestuurder, ‘n 24-jarige man, is 'n paar uur na die voorval deur die polisie by sy huis in Pacaltsdorp in hegtenis geneem. Hy het vandeesweek in die George-landdroshof verskyn waar die saak tot 21 Oktober uitgestel is vir 'n formele borgtogaansoek. Die verdagte bly in aanhouding.
Die Polo het volgens inligting uit die rigting van die dorp gekom en die Tazz het reeds by die eiland voor die vulstasie gedraai toe die Polo dit, vermoedelik teen 'n baie hoë spoed, aan die passasierskant tref.
Nicolene se pa, Pietie Boy Jansen, sê sy dogter was die tipe persoon wat almal met haar sin vir humor wou laat lag. Hy en sy vrou, Dolly, sê sy was 'n aangename, vriendelike kind. Hulle vertel sy is Vrydagaand saam met Emmerentia by die huis weg. Fernol het hulle by die huis kom haal voor hulle by 'n bekende kuierplek in Beachweg gaan kuier het. Haar pa sê hulle is so voor 01:00 Saterdagoggend ingelig dat die motor waarin hul dogters was, in 'n ongeluk betrokke was.
"Toe ek daar kom het my een dogter in die pad gelê soos sy uit die motor geslinger is en die ambulanswerkers was besig om Nicolene uit die kar te haal."
Hy sê hulle is reguit ambulans toe met haar en het agter toe deure gewerk om haar by te bring. Hy is glo gevra om by sy ander dogter te wag. "Die een ambulanswerker het my nadergeroep en net gesê, meneer ons het slegte nuus vir jou. Jou dogter is breindood." Volgens hom moes die impak van die ongeluk Nicolene se kop so hard getref het, dat sy breinskade opgedoen het. Emmerentia wou nie met George Herald praat tydens 'n besoek by die familie se huis nie. Nicolene laat haar vier kinders, haar ouers en suster agter.
Fernol se verloofde, Elize Booysen, het hom as 'n vriendelike mens beskou. "Hy was 'n mense-mens en sou altyd uit sy pad gaan om mense te help. Baie spontaan. Hy was die steunpilaar van die huis en 'n pa vir sy kinders. Ons gaan hom baie mis, veral die kinders," het sy gesê.
Hy laat ook sy drie kinders en drie broers agter.