Baba sterf op Touwsranten na bakkie hom tref

In nog ‘n noodlottige ongeluk in Touwsranten Saterdag, het ‘n 1-jarige baba gesterf nadat hy deur ‘n bakkie getref is. Die voorval het omstreeks 12:40 in Denneboomstraat plaasgevind toe ‘n Toyota Hilux-bakkie na bewering agteruitgery en die baba getref het.

Siyabulela Adonis het ernstige beserings opgedoen en is op die toneel dood verklaar. Kapt. Malcolm Pojie, die Suid-Kaapse polisiewoordvoerder, het vandeesweek gesê die ondersoek na die omstandighede rondom die ongeluk waarin Siyabulela gesterf het, duur voort.

‘n Interne ondersoek is ook gelas na bewerings dat inwoners ongelukkig is oor die polisie se hantering van die voorval. Inwoners is glo ongelukkig omdat die bestuurder nie op die toneel in hegtenis geneem is nie.

“Alhoewel daar geen formele klagtes van die inwoners self ontvang is nie, is daar ‘n interne ondersoek gelas. Sou daar substansie wees, sal die nodige stappe in terme van ons dissiplinêre regulasies geneem word.

“In so ‘n saak berus die onus op die polisiebeampte wat die toneel bywoon om te bepaal of die situasie ‘n arrestasie verg. Voor arrestasie uitgevoer kan word, is daar sekere regsprosesse wat gevolg moet word. ‘n Arrestasie is nie ’n strafmaatreël nie, maar is ‘n proses waartydens ‘n persoon se teenwoordigheid in die hof verseker word om verantwoording te doen vir die misdaad waarvan so ‘n persoon verdink word.” Niemand is nog in hegtenis geneem nie.