‘Bike’ en kar fees
KNYSNA – Die Hornlee Car & Bike Fanatic Show vind Saterdag 25 September op die Hornlee-sportterrein plaas en dien as 'n fondsinsamelingsfunksie vir die Hornlee Somerfees (HSF) wat vanaf 17 tot 19 Desember gaan plaasvind. Celeste Wabanie is die stigter en koördineerder van die fees wat 'n plaaslike fees is, maar ook een wat baie toeriste na HSF en Hornlee self trek. Die skou sal hierdie jaar vir die eerste keer op die HSFprogram wees. Dit is ook die HSF se vyfde bestaansjaar.
"Ek het hierdie fees met my eie fondse vir ons gemeenskap in Hornlee op die been gebring," verduidelik Wabanie.
Die fees behels verskeie sportsoorte, kinderspeletjies, springkastele, potjiekoskompetisies, lewendige musiek van plaaslike kunstenaars en platejoggies. "Ek het op Saterdag 31 Julie vir die eerste keer gesien hoe die motorskou 'n inpak kan maak op die fees en ek was verbaas om te sien hoe ‘n groot aanwins dit kan wees," sê Waborie.
"Ek sal graag die skou 'n jaarlikse instelling wil maak, hier is geen aktiwiteite vir ons mense nie en hierdie is 'n goeie geleentheid vir ons jeug asook families waar almal saam kan uitkom om dit te geniet."
Daar sal ook twee plaaslike platejoggies wees, DJ Ash Mix Master asook DJ Primo vir vermaak. Verder sal twee kletsrymers, Kyle from the West en Capital G, wat beide plaaslik is, optree om hulle talent te wys en te bemark.
"Daar is reeds inskrywings van die groter Knysna-omgewing, Plettenbergbaai, George, asook Mosselbaai en Gqeberha," sê Wabanie.
"Alle paaie lei na Hornlee en ek vra almal se ondersteuning om alle Covid-19protokolle te volg, daar sal geen toegang sonder maskers wees nie."
Karre en motorfietse sal in verskeie kategorieë geplaas word en die finale sal almal tydens die HSF plaasvind.