Geliefde rugbyspeler sterf in Sedgefield
OUDTSHOORN - "Sydwell het 'n passie vir rugby gehad en het altyd sy hart uit gespeel. Hierdie keer het hy amper letterlik sy hart op die veld gelos."
So het Rodney Gelant, Sydwell Muller (34) se broer die week aan KPHsusterkoerant Oudtshoorn Courant gesê. Muller is Saterdag oorlede na hy vermoedelik 'n hartaanval op die veld gehad het. Hy was 'n kranige sportman en het reeds van 17-jarige ouderdom vir All Blacks in Oudtshoorn gespeel. Sy span het Saterdag in Sedgefield teen die Eagle Stars gespeel.
Muller was verbonde aan die SANDF in Potchefstroom, waarna hy vir 'n wyle by Virgin Active in George gewerk het. Hy het onlangs na Oudtshoorn teruggekeer en het veral op sy werk as persoonlike afrigter gefokus. Volgens sy ma, Christene Muller, wat ook 'n raadslid by die Oudtshoorn-munisipaliteit is, het sy Saterdag 'n oproep gekry om te sê dat haar seun aan die begin van die tweede helfte op die veld inmekaargesak het.
"Hulle het gesê dat paramedici besig met KPR, maar ek het gesê hulle moet ophou. My hart kon voel hy is nie meer hier nie. Blykbaar het hy 'n bal vir sy spanmaat gegooi, sy bors vasgegryp en geval. Toe ons is Sedgefield aankom was hulle steeds besig om hom te probeer bybring."
Damon Gysman, voorsitter van die All Blacks-rugbyklub, het gesê die span is steeds in skok en sal vandeesweek berading ontvang.
"Dit was ons laaste ligawedstryd en dit was nogal spanningsvol, want ons wou 'n tuis-halfeindstryd hê. Ons is besig om professionele hulp vir ons almal te kry. As voorsitter is ek verward oor hoe dit met so 'n sterk jong man kon gebeur," het hy gesê.
Gysman het gesê Muller was in 'n goeie gees voor die rugbywedstryd Saterdag. "Hy was gelukkig en gereed vir aksie soos gewoonlik. Hy het onlangs pa geword, so dit het hom gelukkiger gemaak. Hy was passievol oor rugby. Ons probeer die verlies hanteer en bied ons innige meegevoel aan sy familie," het hy gesê.
Muller se seuntjie, Cayine van Niekerk, was die week een week oud. Gelant sê sy broer was 'n persoon met die grootste respek vir almal.
"Ek en hy was baie na aan mekaar. Tussen sy vriende was hy die entertainer en die beskermengel en die omgeemens. Selfs sy vriende het die week gesê Sydwell was 'n lieflike mens. As gesin was en is ons verras oor die hoeveelheid pragtige omgeeboodskappe van heinde en ver. Nooit sou ons kon dink dat hy in sy kort leeftyd soveel mense met sy mooi persoonlikheid aangeraak het nie."
Hy laat sy ma, broer, Lee-Ann Gelant (suster), Jada (susterskind), oudste broer Randall, sy meisie, Nikayla en seun agter.
Die roudienste is as volg:
Woensdag 18 Oktober is daar 'n roudiens om 18:00 by die VGK in 7de Laan Bridgton.
Donderdag om 17:00 sal daar 'n verbyrit by Muller se huis in Prinsstraat,
Bridgton, Oudtshoorn wees. Voertuie gaan op die hoek van Rossouw- en Berginstraat bymekaarkom. Saterdag se diens begin 11:00 by die huis in Prinsstraat en die roudiens is om 12:00 by die VGK.