Arende maak reg vir die nuwe seisoen
TUINROETE -
Die SWD Arende se amptelike wedstrydverpligtinge begin eers in Februarie, maar die span en sy afrigtingskorps sit nie stil nie.
Anton Moolman, hoofafrigter en sy afrigtingspan, het 'n groep van
31 spelers bymekaar getrek en gekontrakteer.
Amptelik het die spelers se kontrakte op 6 November begin, maar hulle is reeds van 29 September aan die gereedmaak vir die nuwe seisoen. Die Arende het reeds opwarmingswedstryde teen die Stormers en 'n Sharks uitnodigingspanne agter die rug. Verlede naweek (18 November) het die span teen 'n groep spelers van die Stormers in Hermanus uitgedraf. Die Arende het 51-14 verloor.
Daar is nog vriendskaplike wedstryde voor die amptelike wedstryde begin. Moolman het Maandag 20 November gesê op die oomblik word geleenthede geskep en benut om die spelers fiks te ry. Voorts om hulle te laat verstaan wat is die afrigtingspan se filosofie en die soort rugby wat hulle wil hê die span moet speel. In die geheel gesien is hy sover gelukkig.
Daar is een of twee aspekte wat aandag kry en daar word onder meer gekyk na die vaste vyf voorspelers.
Die Arende neem aanstaande jaar aan twee kompetisies deel, naamlik die SA Cup (einde Februarie tot Junie) en die eerste divisie van die Curriebekerreeks (Junie/ Julie).
Volgens Moolman bied die vriendskaplike wedstryde geleentheid vir die spelers om hul vaardighede te bepaal en vir die afrigtingskorps om die spelers te assesseer. Alles is 'n voortdurende proses sodat die span gereed sal wees in Februarie. Die uitslae van sulke wedstryde reflekteer nie altyd positiewe resultate nie. Hy het egter bygevoeg: "Al verloor ons is daar tog positiewe uit te haal." In die groep vir die nuwe seisoen is 17 spelers van die streek. Altesaam 20 van die vorige groep is weer daar. Van die nuwe spelers in die groep het reeds hul hande opgesteek. Moolman glo hulle is besig om in die regte rigting te beweeg. Opvallend vir hom is dat die spelers baie toegewyd is. Die Arende het in die vorige seisoen in die eindstryd die Nzanzi-beker teen die Valke verloor en derde geëindig in die eerste divisie van die Curriebekerreeks.