Lloyd Bosman se verjaarsdaggeskenk
OUDTSHOORN - Die bekende langafstandatleet Lloyd Bosman, het Saterdag 24 Februarie weer die Kango-halfmarathon gewen toe hy vier minute voor sy naaste teenstander oor die wenstreep gehardloop het.
Die gewilde wedloop het naby Schoemanshoek begin en by die weermagbasis in Oudtshoorn klaargemaak. Daar was ook 'n 42 km-wedloop.
Dat Bosman nie iemand is wat op sy louere rus nie, was duidelik Sondag te sien toe hy op sy 36ste verjaarsdag alweer geoefen het.
Hy het Dinsdag 27 Februarie gesê sy tyd was een uur en vyf minute. Bosman is die rekordhouer van die wedloop en hy het sy eie rekord met net twee sekondes gemis. Verlede jaar het hy as gevolg van ander verpligtinge nie deelgeneem nie. Selwyn Matthews, 'n oefenmaat het verlede jaar gewen en was vanjaar tweede.
Volgens Bosman het hy en van die ander atlete tot by die 6 km-merk saamgehardloop, daarna het hy weggebreek.
Hy het gesê gewoonlik is dit 'n baie moeilike, maar aangename wedloop. Die afgelope Saterdag was dit baie goeie en koel weersomstandighede.
Saterdag se oorwinning was vreugdevol en ook 'n verjaarsdaggeskenk al was sy verjaarsdag eers die volgende dag.
Hy het die vorige naweek aan 'n marathon in die Kaap deelgeneem en gewen.
Hy het toe gekwalifiseer vir die
Twee Oseane-marathon wat op 14 April plaasvind.
Benewens sy oefenry Sondag het hy ook Maandag geoefen vir sy volgende wedloop op 16 Maart, die Weskus Langebaan-marathon.
Hy is die verdedigende kampioen. Op die vraag waarom hy al weer Sondag, minder as 24 uur na sy oorwinning geoefen het, het hy geantwoord: "Daar is nie tyd vir vakansie nie."