BILTONG-SAMPIOEN-EN-BLOMKOOLKASSEROL
Genoeg vir 4 – 6 bygeregporsies BESTANDDELE
(4 porsies = 9 g koolhidrate per porsie, 6 porsies = 6 g koolhidrate per porsie) 1 kop blomkool, in blommetjies gebreek ½ k water 1 x 250 g-bakkie sampioene van jou keuse (jy kan ook ’n mengsel gebruik) 5 e botter 1 bossie sprietuie, gekap 1 e fyngedrukte knoffel Sout en peper na smaak 1 k vars room 1½ k gerasperde cheddarkaas ½ k roomkaas 1 handvol redelike klam, vetterige biltong (of gaar steakrepies deeglik met braaispeserye besprinkel) Neutmuskaat na smaak
METODE
Om oor ’n oop vuur te berei: Plaas die blomkoolblommetjies en water in ’n gietysterpot (potjie) en laat vir 5 minute stoom. Sodra die water verdamp het, kan jy die sampioene, botter, sprietuie, knoffel en geurmiddels byvoeg. Soteer en roer tot die blomkool sag is. Meng die room, 1 k gerasperde kaas en die roomkaas saam in ’n beker en giet dit in die pot. Laat dit prut en effe afkook. Voeg die biltong by en roer liggies deur die groente. Sprinkel die orige kaas oor, stuif ’n klein bietjie neutmuskaat oor, sit die deksel op en haal van die direkte kole af. Plaas
eenkant vir ’n paar minute voor jy dit voorsit.
Om in die oond te bak:
Voorverhit die oond tot 180°C. Stoom die blomkoolblommetjies. Verhit die botter in ’n pan en soteer die sampioene, sprietuie en knoffel daarin. Meng 1 k van die gerasperde kaas, die room, roomkaas en geurmiddels saam. Dreineer die blomkool en roer dit by die room-enkaasmengsel in. Voeg die sampioenmengsel en biltong by. Roer liggies deur en giet in ’n kasserol of oondbak. Sprinkel kaas oor, stuif ’n klein bietjie neutmuskaat oor, en bak vir 20–25 minute.