MEXIKAANSE HOENDEREN-AVOKADOSLAAI

Genoeg vir 4 BESTANDDELE

4 hoenderborsies, met die vel en been aan Sout en varsgemaalde swartpeper Vir die marinade 4 e olie 4 e lemoensap ½ t fyn komyn Vir die salsa 4 middelslag-tamaties, geskil, ontpit en in klein blokkies gesny 1 ui, fyngekap 3 e olie 2 e lemmetjiesap (of 1 e suurlemoen- en 1 e lemoensap gemeng) 3 e vars koljanderblare, gekap 2 knoffeltoontjies, gekneus en fyngekap 1 groen brandrissie, ontpit, naatjies verwyder en fyngekap Sout en varsgemaalde swartpeper Vir die slaai 2 avokado’s, ontpit en in skywe gesny 2 e suurlemoensap Blaarslaai van jou keuse 1 rooiui, fyngekap Sout en varsgemaalde swartpeper

METODE

1. Sny diep snytjies in die hoenderborsies met ’n skerp mes. Pak dit in ’n vlak glasbak. 2. Meng die marinadebestanddele en gooi oor die borsies. Bedek die bak met kleefplastiek en sit vir minstens 30 minute in die yskas om te marineer. 3. Voorverhit die oondrooster tot op sy warmste. 4. Meng intussen al die bestanddele vir die salsa in ’n bakkie, bedek met kleefplastiek en bêre in die yskas. 5. Haal die hoenderborsies uit die marinade, pak op die rakkie van ’n oondroosterpan en geur na smaak. Rooster vir sowat 10 minute aan ’n kant. Laat staan vir 10 minute. Trek die vel af as jy wil en sny die vleis in skywe. 6. Besprinkel die avokadoskywe met die suurlemoensap. 7. Pak die slaaiblare op ’n opdienbord, skep die salsa in ’n netjiese hopie in die middel van die blare en rangskik die hoender en avokado rondom die salsa. 8. Strooi die ui oor en geur na smaak. Sit voor met tortillas en suurroom.