LAMSKROON MET JONGAARTAPPELS

Genoeg vir 6 – 8 BESTANDDELE

Vir die lamskroon: 1 hele lamsribstuk van 16 tjops of 2 stukke met 8 tjops elk 3 eetlepels olyfolie 1 teelepel growwe sout ½ teelepel varsgemaalde swartpeper 6 knoffeltoontjies, gekneus en fyngekap 2 eetlepels vars tiemieblare, gekap 1½ teelepel fyn koljander Vir die aartappels 16 – 20 jongaartappeltjies 1 – 2 eetlepels olyfolie Sout en varsgemaalde swartpeper na smaak ’n Paar tiemietakkies

METODE

Lamskroon: Meng die olyfolie, growwe sout, swartpeper, knoffel, tiemie en koljander en smeer die kroon goed aan die binne- en buitekant. Plaas die kroon op ’n oondroosterpan (Ek gebruik my ringkoekof bundtpan, want dit pas perfek daarin om sy vorm te behou en die roostersappe op te vang.) Bedek elke kaal been afsonderlik met foelie. Rooster vir 20 minute in ’n voorverhitte oond van 220°C. Verlaag die oondtemperatuur tot 180°C en rooster vir nog ’n uur. Laat staan vir minstens 20 minute voor jy dit opdien. (Onthou om die foelie af te haal voor opdiening.) Aartappels: Kook die aartappels met skil en al tot sag. Plaas dan op ’n bakplaat wat met foelie gevoer en met olyfolie gesmeer is. Slaan elke aartappel liggies met ’n vleishamer sodat dit oopbars. Meng die olyfolie met die pansappe van die kroonstuk en sprinkel oor die aartappels. Geur met sout en peper en sprinkel die tiemietakkies oor. Plaas in ’n oondrooster op maksimum hitte vir ongeveer 5 – 7 minute of tot die aartappels goudbruin is.

WENK: Die maklikste is om jou slagter te vra om die lamskroon vir jou voor te berei, maar sê hy moet die bene heel hou. Onthou om hom te sê om die vleislappe wat hy van die been afgesny het, heeltemal te verwyder. Baie slagters stroop die bene maar vou die vleis na binne sodat jy niks van die vleis verloor nie. Sny dit af, anders gaan jou vleis nooit gaar word nie.