STEAK-EN-UIE-WRAP MET MIELIESALSA

Genoeg vir 4 BESTANDDELE

Vir die salsa 1 x 400 g blik mieliepitte, goed afgespoel en gedreineer 2 – 3 stingeluie (spring onions), fyngekap 5 peppadews, in repies gesny 1 eetlepel vars, gekapte koljanderblare 1 eetlepel suurlemoensap Gerasperde skil van 1 suurlemoen 3 eetlepels volroomjogurt 3 eetlepels mayonnaise Sout en varsgemaalde swartpeper na smaak Vir die uie 2 eetlepels olie 1 eetlepel botter 2 rooi uie (of gewone uie), in skywe gesny 1 teelepel Karibiese speserymengsel (resep hieronder) Sout en varsgemaalde swartpeper na smaak Vir die steak 140 g kruisskyf (rump) of enige ander steaksnit van jou keuse 1 eetlepel Karibiese speserymengsel (resep hieronder) Olie Vir die samestelling 4 wraps Blare van jou keuse

METODE

Meng al die bestanddele vir die salsa in ’n glasbak, bedek met kleefplastiek en laat in die yskas totdat jy die res van die bestanddele vir die wrap voorberei het. Verhit die botter en olie vir die uie in ’n pan oor matige tot warm hitte. Braai die uie daarin tot sag en deurskynend. Sprinkel die speserymengsel bo-oor, meng goed en braai nog ’n paar minute. Geur met sout en peper. Sprinkel die speserymengsel oor die steak en vryf liggies in sodat dit alkant bedek is. Laat staan vir 15 minute. Verhit ’n riffelpan oor hoë hitte. Gebruik ’n kwas en verf ’n bietjie olie oor die steak. Braai vir 1 minuut aan die een kant, draai om en braai 1 minuut aan die ander kant. Haal van die hitte af. Bedek die pan met ’n stuk foelie en laat staan vir 10 minute. Plaas ’n hopie blare in die middel van elke wrap en verdeel die uie tussen die wraps en skep bo-op die blare. Sny die steak met ’n skerp mes in repies en rangskik bo-op. Skep ’n bietjie salsa bo-op, rol toe en bedien. Sit ’n bakkie met die res van die salsa op die tafel sodat dié wat nog wil hê, kan skep.