KORSLOSE HOENDER-EN-BLOMKOOL-QUICHE

Genoeg vir 4 – 6 BESTANDDELE

3 eetlepels olie 1 eetlepel vars gekapte tiemie Gerasperde skil en sap van 1 suurlemoen 4 vellose, ontbeende hoenderborsies Sout en varsgemaalde swartpeper 1 kleinerige blomkool, in blommetjies gebreek en in soutwater gaargekook of gestoom ½ x 250 g houer maaskaas (cottage cheese) 1 koppie room 6 eiers 1 eetlepel korreltjie-mosterd

METODE

Meng die olie, tiemie, suurlemoensap en -skil saam en giet oor die hoenderborsies. Laat staan vir 20 minute. Plaas die hoenderstukke in ’n oondroosterpan en geur met sout en peper. Bak vir 20 - 30 minute in ’n voorverhitte oond van 180ºC of tot net-net gaar. Laat effens afkoel en sny in repies. Rangskik die hoenderrepies en blomkoolblommetjies in ’n gesmeerde oondbak. Klits die maaskaas, room, eiers en mosterd saam en geur met sout en peper. Giet die eiermengsel oor die blomkool en hoender en bak vir 30 – 40 minute in ’n voorverhitte oond van 180ºC of tot heeltemal gestol en mooi goudbruin.

WENK:

Jy kan oorskiet gaar hoender of ’n klaar gaar roosterhoender gebruik in die plek van die hoenderborsies. Meng dan net 1 eetlepel vars of 1 teelepel droë tiemie en ’n bietjie suurlemoenskil by jou eiermengsel. >>