KORSLOSE VIS-EN-AARTAPPELQUICHE

Genoeg vir 4 – 6 BESTANDDELE

1 koppie melk 3 eetlepels botter 400 g skelvis (in mootjies gesny) ’n Handvol vars, gekapte pietersielie Sout en varsgemaalde swartpeper na smaak 4 groterige aartappels, in hul skil gekook Genoeg melk om 2 koppies vloeistof vol te maak saam met die kookvloeistowwe van die vis 6 eiers, gesklits

METODE

Verhit die melk en botter saam in ’n groot pan en plaas die vismootjies daarin. Sprinkel die pietersielie bo-oor en geur met sout en peper. Bring tot kookpunt, verlaag die hitte, bedek die pan en stoom tot net-net gaar. Giet die kookvloeistof van die vis af en vul aan met die ekstra melk totdat jy 2 koppies vloeistof het. Trek die velletjies van die vis af en verwyder grate. Trek die skille van die aartappels af en maak fyn met ’n aartappeldrukker. Meng die vis en die fyn aartappels. Geur met sout en peper. Klits die eiers en die vloeistofmengsel saam en meng met die aartappelmengsel. Skep in ’n gesmeerde oondbak en bak vir ongeveer 30 – 40 minute of tot gestol en goudbruin in ’n voorverhitte oond van 180ºC.