BILTONG-EN-PEPPADEW
Genoeg vir 1 standaard-grootte quiche of 8 – 12 kleintjies (afhangende van die grootte van jou mini-pannetjies)
BESTANDDELE
Vir die kors 1½ koppies koekmeel ’n Knippie sout 6 eetlepels botter Yswater Vir die vulsel 4 eiers 2 eiergele ½ koppie fyn, verpoeierde biltong Sout en varsgemaalde swartpeper na smaak ’n Knippie varsgerasperde neutmuskaat (nutmeg) 5 – 7 peppadews, in klein repies gesny 1/3 koppie suurroom ¼ koppie melk
METODE
Maak eers die kors: Sif die koekmeel en sout saam en vryf die botter met jou vingerpunte in totdat dit soos growwe mieliemeel lyk. Giet bietjies-bietjies yswater by en meng totdat jy ’n sagte, hanteerbare deeg het. Bedek met kleefplastiek en laat vir 30 minute in die yskas rus. Rol die deeg uit op ’n meelbestrooide oppervlak en voer mini-quichepannetjies of ’n gesmeerde tert- of quichebord daarmee uit. Prik die bodem van die kors oraloor met ’n vurk. Plaas bakpapier bo-op die kors en giet keramiekbakbone of gewone droëbone of rys bo-op. Bak in ’n voorverhitte oond van 200oC vir 10 minute. Verwyder die bakpapier en bone en bak oop vir nog 5 – 7 minute. Hou die kors eenkant. Maak die vulsel: Meng al die vulselbestanddele saam en giet in die kors of korsies. Bak vir 20 – 25 minute vir die kleintjies en 30 – 40 minute vir die grote (of tot byna heeltemal gestol) in ’n voorverhitte oond van 180⁰C. Garneer die tertjies met repies peppadew.